బిల్లులు చెల్లించాలని రోడ్డెక్కిన కాంట్రాక్టర్లు

పార్లమెంట్‌ ఎన్నికల సమయంలో వివిధ ఏర్పాట్ల కోసం కాంట్రాక్ట్‌ దక్కించుకున్న కాంట్రాక్టర్లు లక్షలు పెట్టుబడులు పెట్టి చేతులు కాల్చుకున్నట్లు తెలుస్తున్నది. అప్పులు చేసి మరీ పోలింగ్‌ సిబ్బంది మొదలు, పోలీస్‌ సిబ్బంది వరకు ఆహారం, టెంట్లు, టేబుళ్లు, స్టేషనరీ, చివరకు వీడియోగ్రఫీ సైతం ఏర్పాట్లు చేశారు. ఇలా అధికారులు ఏది చెబితే అది సమకూర్చి.. వారు చెప్పిందల్లా చేసిన కాంట్రాక్టర్లు సకాలంలో బిల్లులు రాక తలలు పట్టుకుంటున్నారు.

• హైదరాబాద్‌ కలెక్టరేట్‌ ఎదుట ధర్నా
• పార్లమెంట్‌ ఎన్నికల ఏర్పాట్లకు లక్షలు ఖర్చు
• బిల్లులు రాక తలలు పట్టుకున్న కాంట్రాక్టర్లు

ఖైరతాబాద్‌, జూలై 18: పార్లమెంట్‌ ఎన్నికల సమయంలో వివిధ ఏర్పాట్ల కోసం కాంట్రాక్ట్‌ దక్కించుకున్న కాంట్రాక్టర్లు లక్షలు పెట్టుబడులు పెట్టి చేతులు కాల్చుకున్నట్లు తెలుస్తున్నది. అప్పులు చేసి మరీ పోలింగ్‌ సిబ్బంది మొదలు, పోలీస్‌ సిబ్బంది వరకు ఆహారం, టెంట్లు, టేబుళ్లు, స్టేషనరీ, చివరకు వీడియోగ్రఫీ సైతం ఏర్పాట్లు చేశారు. ఇలా అధికారులు ఏది చెబితే అది సమకూర్చి.. వారు చెప్పిందల్లా చేసిన కాంట్రాక్టర్లు సకాలంలో బిల్లులు రాక తలలు పట్టుకుంటున్నారు.

ఎన్నికల కోడ్‌ పూర్తి కాగానే బిల్లు విడుదలవుతాయని, తమ కష్టాలు తీరుతాయని నమ్మి ఉన్నదంతా ఊడ్చి పెట్టారు. ఎన్నికల కోడ్‌ ముగిసి నెల రోజులు దాటినా ఉన్నతాధికారుల నుంచి స్పందన కరువైంది. అధికారుల ఆఫీసుల చుట్టూ చెప్పులరిగేలా తిరిగినా ఎవరూ పట్టించుకోకపోవడంతో చివరగా రోడ్డెక్కారు. గత శాసనసభ ఎన్నికల్లో పెట్టిన ఖర్చులు సగం మందికి మాత్రమే చెల్లించారని, మిగతా వారికి ఇంకా చెల్లించలేదని, ఇప్పుడు పార్లమెంట్‌ ఎన్నికలకు సంబంధించిన ఖర్చులు రూపాయి కూడా చెల్లించడంలేదని వాపోతున్నారు.

పలువురు అధికారులకు వినతులు

తమ బిల్లులు చెల్లించాలంటూ గురువారం కాంట్రాక్టర్లు రోడ్డెక్కారు. లక్డీకాపూల్‌లోని హైదరాబాద్‌ జిల్లా కలెక్టరేట్‌ వద్ద ధర్నా నిర్వహించారు. ఎన్నికల కమిషన్‌ డబ్బులు విడుదల చేశామని చెబుతున్నా.. అధికారులు మాత్రం బిల్లులు చెల్లించడంలేదని వాపోయారు. అనంతరం జిల్లా కలెక్టర్‌, ఎన్నికల కమిషనర్‌ కార్యాలయాలతోపాటు జీహెచ్‌ఎంసీ కమిషనర్‌ ఆమ్రపాలిని కలిసి వినతిపత్రాలు సమర్పించామని కాంట్రాక్టర్లు సాయినాథ్‌, నరేశ్‌, రాజు, అబ్దుల్‌ నదీమ్‌, శరత్‌, వెంకటేశ్‌ తెలిపారు.