Visit:
సిటీబ్యూరో, నవంబర్‌ 29 (నమస్తే తెలంగాణ): ఆస్ట్రేలియన్‌ పౌరులను లక్ష్యంగా చేసుకుని సుమారు రూ.10కోట్లు కొల్లగొట్టిన అంతర్జాతీయ నకిలీ కాల్‌సెంటర్‌ ముఠా గుట్టును సైబరాబాద్‌ ఎస్‌ఓటీ, సైబర్‌క్రైమ్‌ బృందాలు కలిసి సంయుక్తంగా రట్టు చేశాయి. 9మంది నిందితులను అరెస్టు చేశారు. గచ్చిబౌలిలోని సైబరాబాద్‌ కమిషనరేట్‌లో ఏర్పాటు చేసిన విలేకరుల సమావేశంలో సైబర్‌క్రైమ్స్‌ ఇన్‌చార్జి డీసీపీ వైవీఎస్‌ సుధీంద్ర, మాదాపూర్‌ ఎస్‌ఓటీ డీసీపీ శోభన్‌కుమార్‌తో కలిసి కేసు వివరాలను వెల్లడించారు. ఖమ్మం ప్రాంతానికి చెందిన ప్రవీణ్‌ , ప్రకాశ్‌ 2024లో రిడ్జి ఇట్‌ సొల్యూషన్స్‌ పేరుతో నగరంలోని మాదాపూర్‌, అయ్యప్ప సొసైటీ ప్రాంతంలో అంతర్జాతీయ నకిలీ కాల్‌ సెంటర్‌ను స్థాపించారు. కాల్‌సెంటర్‌లో పనిచేసేందుకు కోల్‌ కతా నుంచి ఏడుగురిని ఎంపిక చేసి మాదాపూర్‌లో ఆశ్రయం కల్పించారు.
అనంతరం ఆస్ట్రేలియన్‌ పౌరులకు మోసపూరిత కాల్స్‌ చేసి, వారి బ్యాంకు ఖాతాల్లో ఉన్న డబ్బును ఎలా తస్కరించాలో కోల్‌కతా వాసులకు శిక్షణ ఇచ్చారు. కాల్‌సెంటర్‌ ద్వారా నిందితులు ఆస్ట్రేలియన్‌ పౌరులకు నకిలీ పాప్‌-అప్‌ లు/ఈ మెయిల్స్‌ ద్వారా కాల్‌సెంటర్‌ నంబర్‌ పంపుతారు. బాధితులు ఆ నంబర్‌కు కాల్‌ చేయగానే అది ఎక్స్‌-లైట్‌ అప్లికేషన్‌ ద్వారా నేరుగా మాదాపూర్‌లోని నిందితులు నిర్వహిస్తున్న నకిలీ కాల్‌సెంటర్‌కు కాల్‌ వస్తుంది. నిందితులు మాయమాటలతో ఎనీడెస్క్‌ అప్లికేషన్‌ ద్వారా బాధితుల కంప్యూటర్‌లకు రిమోట్‌ యాక్సెస్‌కు అనుమతించమని ఒప్పిస్తారు. బాధితులు రిమోట్‌ యాక్సెస్‌కు అనుమతించిన వెంటనే బాధితుల ఆన్‌లైన్‌ బ్యాంకింగ్‌ ఖాతాలకు సంబంధించిన యాక్సెస్‌ పొందుతారు.
వారి ఖాతాల్లో ఉన్న మొత్తాన్ని ఆస్ట్రేలియాలో నివసిస్తున్న భారతీయ పౌరులకు చెందిన స్థానిక బ్యాంక్‌ ఖాతాలకు అక్రమంగా బదిలీ చేస్తారు. ఆ డబ్బును హవాలా, క్రిప్టోకరెన్సీ ఇతర మార్గాల ద్వారా నిధులను భారతదేశానికి మళ్లించి ఆస్ట్రేలియన్‌ పౌరులను మోసగిస్తున్నారు. అక్రమ డబ్బును బదిలీ చేసుకునేందుకు ఆస్ట్రేలియాలో చదువుతున్న భారతీయ విద్యార్థుల ఖాతాలను సేకరించి, వారి ఖాతాల ద్వారా అక్రమ సొమ్మును భారత్‌కు బదిలీ చేసుకుంటున్నారు.
ఈ మేరకు బాధితుల నుంచి ఫిర్యాదు సేకరించిన బాలానగర్‌ ఎస్‌ఓటీ పోలీసులు, సైబర్‌క్రైమ్‌ పోలీసుల సహకారంతో మాదాపూర్‌లోని అయ్యప్ప సొసైటీలో ఉన్న నకిలీ కాల్‌సెంటర్‌పై దాడులు నిర్వహించి, మోసాలకు పాల్పడుతున్న ఖమ్మం జిల్లాకు చెందిన యేపూరి గణేశ్‌, మరంపూడు చెన్నకేశవ, కోల్‌కత్తాకు చెందిన మౌమిత మండల్‌, ఒడిశాకు చెందిన ఇజాజ్‌ అహ్మద్‌, కోలకత్తాకు చెందిన సంబిత్‌రాయ్‌, షన్నిక్‌ బెనర్జీ, మౌమిత మల్లిక్‌, సమద్దర్‌, కునల్‌ సింగ్‌లను అరెస్టు చేశారు. నిందితుల వద్ద నుంచి 12 కంప్యూటర్లు, రెండు రూటర్లు, థార్‌ జీపు, 21సెల్‌ఫోన్‌లు, పాస్‌పోర్టుతో పాటు మూడు స్టాంప్‌లను స్వాధీనం చేసుకున్నారు. పరారీలో ఉన్న నిందితులు ప్రవీణ్‌, ప్రకాశ్‌లతో పాటు మరికొందరి కోసం గాలిస్తున్నామని, వారిని త్వరలోనే అరెస్టు చేస్తామని పోలీసులు తెలిపారు. సమావేశంలో మేడ్చల్‌ ఎస్‌ఓటీ అదనపు డీసీపీ విశ్వప్రసాద్‌, తదితరులు పాల్గొన్నాయి.
