ఆ నొప్పి తగ్గేదెలా?

మీరు చెప్పినదాన్ని బట్టి ఎండోమెట్రియాసిస్‌గా భావించాల్సి ఉంటుంది. సాధారణంగా ప్రతినెలా బిడ్డ పెరుగుదలకు అనుకూలంగా గర్భాశయం అంచుల వెంట ఒక పొర ఏర్పడుతుంది.

మేడమ్‌! నా వయసు 32 సంవత్సరాలు. నెలసరికి రెండు మూడు రోజుల ముందునుంచీ కుడివైపు పొత్తికడుపులోవిపరీతంగా నొప్పి వస్తుంది. వచ్చిన ప్రతిసారీ అరగంట సేపు నరకం అనుభవిస్తాను. ఆ తర్వాత క్రమంగా అదే తగ్గిపోతుంది. నాకు పెండ్లయి నాలుగు నెలలు అవుతున్నది.
పీరియడ్స్‌కు ముందు వారం రోజుల నుంచీ కలయిక తర్వాత కూడా పొత్తికడుపు నొప్పి విపరీతంగా వేధిస్తున్నది. పెళ్లికి ముందే గైనకాలజిస్ట్‌ను సంప్రదించాను. స్కాన్‌ తీసి ఏ ఇబ్బందీ లేదన్నారు. మందులు కూడా ఇవ్వలేదు. కానీ ఇంకా నొప్పి తగ్గలేదు. నా బాధ తీరే మార్గం ఉందా? -ఓ సోదరి

మీరు చెప్పినదాన్ని బట్టి ఎండోమెట్రియాసిస్‌గా భావించాల్సి ఉంటుంది. సాధారణంగా ప్రతినెలా బిడ్డ పెరుగుదలకు అనుకూలంగా గర్భాశయం అంచుల వెంట ఒక పొర ఏర్పడుతుంది. దాన్ని ఎండోమెట్రియం అని పిలుస్తారు. ఆ నెల విడుదలైన అండం ఫలదీకరణ చెందకపోతే.. ఈ పొర విచ్ఛిన్నమై బయటికి వచ్చేస్తుంది. అదే నెలసరి. అయితే గర్భాశయంలో ఏర్పడాల్సిన ఈ పొర కొందరిలో గర్భాశయం బయట, అండాశయంలో, మూత్రాశయంలో.. ఇలా వేరేచోట ఏర్పడుతుంది. నెలసరి సమయంలో వచ్చే హార్మోన్ల తేడాలకు ఇది కూడా స్పందిస్తుంది. కానీ ఇది గర్భాశయం అంచుల దగ్గర ఏర్పడలేదు కాబట్టి దానిలా బయటికి వచ్చే అవకాశం ఉండదు. అందుకే నెలసరి సమయంలో శరీరాన్ని బాధిస్తుంది. కొన్నిసార్లు పిల్లలు కలగడానికి అడ్డంకిగా కూడా మారవచ్చు. ఎండోమెట్రియాసిస్‌ను పూర్తిస్థాయిలో తగ్గించలేం. కాకపోతే కొంత ఉపశమనం కలిగించవచ్చు. ఇబ్బందిని తగ్గించేందుకు కొన్ని చికిత్సలు చేయవచ్చు. మీరు ఇంతకుమునుపే డాక్టరును సంప్రదించానని చెప్పారు. అయితే పూర్తిస్థాయిలో పరీక్షలు చేయలేదని అర్థం అవుతున్నది. మరొకసారి గైనకాలజిస్ట్‌ను సంప్రదించండి. పరీక్షలు నిర్వహించి ఓ పరిష్కారం సూచిస్తారు.

-డాక్టర్‌ పి. బాలాంబ సీనియర్‌ గైనకాలజిస్ట్‌