Visit:
Peptides | పెప్టైడ్స్.. ప్రస్తుతం ఫిట్నెస్, వెల్నెస్ రంగాల్లో వేగంగా ప్రాచుర్యం పొందుతున్నాయి. శరీరాన్ని మరింత మెరుగ్గా తీర్చిదిద్దడం, కండరాల పెరుగుదల, బరువు తగ్గడం, చర్మం మెరుగుపడటం, నిద్ర, మానసిక చురుకుదనం, వృద్ధాప్యాన్ని ఆలస్యం చేయడం వంటి అనేక ప్రయోజనాలు వీటివల్ల కలుగుతాయని సోషల్ మీడియాలో ప్రచారం జరుగుతోంది. అయితే ఆన్లైన్లో నియంత్రణ లేకుండా విక్రయించే కొన్ని సింథటిక్ పెప్టైడ్లపై తగినంత శాస్త్రీయ ఆధారాలు లేవని నిపుణులు హెచ్చరిస్తున్నారు. పెప్టైడ్లు అంటే అమైనో ఆమ్లాలతో ఏర్పడిన చిన్న గొలుసులు. ఇవి సహజంగానే మన శరీరంలో ఉంటాయి, కణజాలాల మరమ్మత్తు వంటి వివిధ జీవక్రియలను నియంత్రించడంలో సహాయపడతాయి. ప్రయోగశాలల్లో తయారు చేసే కొన్ని పెప్టైడ్లను ఇన్సులిన్, జీఎల్పీ-1 ఆధారిత బరువు తగ్గించే మందులు వంటి సాధారణ ఔషధాల్లో క్రియాశీల పదార్థాలుగా ఉపయోగిస్తారు. అయితే వైద్యపరంగా అనుమతి లేని సింథటిక్ పెప్టైడ్లు మాత్రం పూర్తిగా భిన్నమైన విషయం.
ఫిట్నెస్ ప్రపంచంలో కొందరు వ్యక్తులు వైద్యుల పర్యవేక్షణ లేకుండానే పెప్టైడ్లను ఇంజెక్షన్ల రూపంలో ఉపయోగిస్తున్నారు. జీహెచ్కే-సీయూ, రెటాట్రుటైడ్, సెలాంక్, బీపీసీ-157 వంటి పేర్లు ఆన్లైన్ ఫోమ్లు, సోషల్ మీడియా, జిమ్ వర్గాల్లో ఎక్కువగా కనిపిస్తున్నాయి. ఇవి చర్మ సౌందర్యం, ఆకలి నియంత్రణ, ఆందోళన తగ్గడం, కండరాలు లేదా కణజాలాల రికవరీ వంటి ప్రయోజనాలను అందిస్తాయని వినియోగదారులు చెబుతున్నప్పటికీ, వీటి ప్రభావాలపై మనుషుల్లో తగిన స్థాయిలో పరిశోధనలు జరగలేదని నిపుణులు చెబుతున్నారు. కొంతమంది వినియోగదారులు పెప్టైడ్లను తమ రోజువారీ ఫిట్నెస్ రొటీన్లో భాగంగా మార్చుకుంటున్నారు. ఆన్లైన్ చర్చా వేదికల్లో ఎంత మోతాదులో తీసుకోవాలి, ఎంత తరచూ ఇంజెక్షన్ చేసుకోవాలి వంటి విషయాలపై కూడా పరస్పరం సలహాలు ఇచ్చుకుంటున్నారు. అయితే వైద్యపరంగా అనుమతి లేని ఉత్పత్తులకు అధికారిక వినియోగ మార్గదర్శకాలు లేకపోవడం వల్ల స్వయంగా వాటిని ఉపయోగించడం ప్రమాదకరంగా మారే అవకాశాలు ఉంటాయని వైద్య నిపుణులు హెచ్చరిస్తున్నారు.
పెప్టైడ్ల వల్ల కలిగే ప్రయోజనాలపై సోషల్ మీడియాలో విస్తృతంగా ప్రచారం జరుగుతున్నప్పటికీ, వాటిని సమర్థించే బలమైన శాస్త్రీయ ఆధారాలు పరిమితంగానే ఉన్నాయి. కొన్ని పెప్టైడ్లను మనుషులపై సరైన స్థాయిలో పరీక్షించలేదని నిపుణులు చెబుతున్నారు. విస్తృత స్థాయి, యాదృచ్ఛిక నియంత్రిత క్లినికల్ ట్రయల్స్ ద్వారా వాటి ప్రయోజనాలు నిర్ధారణ కాలేదని పరిశోధకులు హెచ్చరిస్తున్నారు. వైద్యపరమైన అనుమతి లేకుండా పెప్టైడ్లను ఉపయోగించడం వల్ల ఆరోగ్యానికి తీవ్రమైన ప్రమాదాలు ఎదురయ్యే అవకాశం ఉందని చెబుతున్నారు. వివిధ దేశాల్లో పెప్టైడ్లు ఉపయోగించిన తర్వాత కొంతమంది ఆసుపత్రుల్లో చేరిన ఘటనలు కూడా నమోదయ్యాయి. ముఖ్యంగా ఆస్ట్రేలియాలో జూన్లో రెటాట్రుటైడ్ అని లేబుల్ చేసిన ఉత్పత్తులతో సంబంధం ఉన్న తీవ్రమైన కాలేయ గాయాల కేసులు ఆరు నమోదైనట్లు ప్రభుత్వం వెల్లడించింది. పెప్టైడ్లను ఎంతమంది ఉపయోగిస్తున్నారో కచ్చితంగా అంచనా వేయడం కష్టంగా ఉన్నప్పటికీ, ఇటీవల వాటిపై పెరుగుతున్న ఆసక్తి, వినియోగం ఆందోళన కలిగించే స్థాయిలో ఉందని క్రీడా సామాజిక శాస్త్ర నిపుణులు పేర్కొంటున్నారు. సోషల్ మీడియా, ఫిట్నెస్ ఇన్ఫ్లుయెన్సర్లు, వెల్నెస్ పరిశ్రమలు శరీరాన్ని రసాయన పదార్థాల ద్వారా నిరంతరం ఆప్టిమైజ్ చేసుకోవచ్చనే భావనను ప్రోత్సహిస్తున్నాయని నిపుణులు విమర్శిస్తున్నారు.
ముఖ్యంగా ఆన్లైన్లో తమను తాము నిపుణులుగా చెప్పుకునే కొందరు వ్యక్తులు శరీరాకృతిని మెరుగుపరచుకోవడానికి పెప్టైడ్లను ఎలా ఉపయోగించాలో సలహాలు కూడా విక్రయిస్తున్నారు. అయితే స్వయంగా ప్రయోగాలు చేయడం ద్వారా వచ్చిన అనుభవాలను శాస్త్రీయ ఆధారాలుగా పరిగణించడం సరికాదని పరిశోధకులు స్పష్టం చేస్తున్నారు. పెప్టైడ్ల విషయంలో పరిశోధనలకు తగినంత సమయం ఇవ్వకుండా సోషల్ మీడియాలో కనిపించే సానుకూల అనుభవాలకు ఎక్కువ ప్రాధాన్యం ఇవ్వడం ప్రమాదకరమని నిపుణులు అంటున్నారు. ముఖ్యంగా వైద్యపరంగా అనుమతి లేని పెప్టైడ్లను శరీరాకృతి లేదా ఫిట్నెస్ కోసం స్వయంగా ఇంజెక్షన్ చేసుకోవడం వల్ల కలిగే దీర్ఘకాలిక ప్రభావాలపై ఇంకా స్పష్టమైన సమాచారం అందుబాటులో లేదని వారు చెబుతున్నారు.
