Food for Health | నిండు నూరేళ్లు బ‌త‌కాలంటే ఇలాంటి ఫుడ్ తీసుకోవాలి..

Food for Health | నిండు నూరేండ్లు ఆరోగ్యంగా జీవించాలని ఎవరికి మాత్రం ఉండదు? కానీ వ్యాయామాన్ని జీవితంలో ఓ భాగం చేసుకోవడానికి, ఆహారపు అలవాట్లను మార్చుకోవడానికి తగిన ప్రయత్నాలు మాత్రం చేయం. ముఖ్యంగా మన ఆహారపు అలవాట్లు జీవన ప్రమాణం మీద తీవ్ర ప్రభావం చూపుతాయని చెబుతున్నారు నిపుణులు. తిండికి సంబంధించిన పొరపాట్ల వల్లే ఏటా కోటికి పైగా మరణాలు, 25 కోట్లకు పైగా తీవ్ర ఆరోగ్య సమస్యలు తలెత్తుతున్నాయని ఓ నివేదిక సారాంశం. ఈ విషయాల ఆధారంగా ఒక వెబ్‌సైట్‌ మొదలైంది. మన ఆహార విధానాన్ని సరిచేసుకుంటే.. జీవన ప్రమాణంలో ఎంత పెరుగుదల ఉంటుందో లెక్కగట్టి చెప్పేస్తుంది. ఆ ప్రకారం, ఇరవై ఏండ్ల యుక్త వయసులోనే తగిన మార్పులు చేసుకుంటే… పదేండ్లకు పైగానే ఆయువు పెరుగుతుందట. అరవై ఏండ్ల వయసులో కూడా తృణధాన్యాలు, పప్పుదినుసులు లాంటి మంచి ఆహారం తీసుకుంటూ.. ప్రాసెస్‌ చేసిన పదార్థాలను తగ్గించుకుంటే 8 ఏండ్ల ఆయుర్దాయం పెరిగే అవకాశం ఉన్నదట. ఆఖరికి ఎనభై ఏండ్ల వయసులోనూ మంచి ఆహారం వైపు మారితే ఇంకొన్నేండ్లు భూమిపై నూకలు ఉంటాయని తేల్చారు. కావాలంటే, మీరు కూడా food4healthylife.orgను ఓసారి చూడండి.