Pregnancy | నమస్తే. నాకిప్పుడు ఏడో నెల. ఉసిరికాయలు తినాలనిపిస్తున్నది. కానీ నెలలు నిండుతున్నప్పుడు ఉసిరికాయలు తింటే కడుపులోని బిడ్డ ఒంటి మీద నల్ల మచ్చలు ఏర్పడతాయని అంటున్నారు. నిజమేనా?
కడుపుతో ఉన్నప్పుడు పులుపు తినాలనిపించడం సహజమే. కొంతమందికి తొలి నెలల్లోనే ఈ కోరికలు కలిగితే, కొంతమందికి నెలలు నిండుతున్నా పులుపు మీదికి మనసు లాగుతూనే ఉంటుంది. ఇది చాలా సాధారణం. కాబట్టి మీకు ఉసిరికాయలు తినాలనిపిస్తే చక్కగా తినండి. దీనివల్ల బిడ్డ శరీరం మీద నల్లమచ్చలు ఏర్పడతాయన్నది నిజం కాదు. పైగా వీటిలోని విటమిన్-సి, ఫోలిక్ యాసిడ్ బిడ్డ ఎదుగుదలకు సహకరిస్తాయి.
అందులోనూ, ఉసిరికాయ పచ్చడి రూపంలో కంటే.. నేరుగా తింటే ఇంకా మంచిది. గర్భిణుల ఆహార విషయానికి వస్తే, ఉడకబెట్టిన పదార్థాలు ఎక్కువగా తీసుకోవాలి. వేపుళ్లు తగ్గించాలి. తీపి పదార్థాలకు దూరంగా ఉండటం మంచిది. ఉప్పు ఎక్కువగా ఉండే ఊరగాయలు తక్కువ తినాలి. కూరగాయలు, అన్నిరకాల పండ్లు తీసుకోవచ్చు. ఆకుకూరలు ఎంతో మేలు చేస్తాయి. బయటి ఆహారానికి దూరంగా ఉండాలి.
డాక్టర్ పి. బాలాంబ
సీనియర్ గైనకాలజిస్ట్