Fasting | ఉప‌వాసం కేవ‌లం సంప్ర‌దాయ‌మేనా? ఆరోగ్యానికి ఏదైనా మేలు చేస్తుందా?

Fasting | ఉపవాసం ఓ సంప్రదాయం మాత్రమే కాదు! ఆరోగ్యాన్ని ప్రభావితం చేసే అలవాటు కూడా. ఉపవాసం వల్ల కొవ్వు కరుగుతుందనీ, జీర్ణవ్యవస్థ మెరుగుపడుతుందనీ తెలుసు. కానీ ఏకంగా మధుమేహం లాంటి సమస్యలను నివారించడంలోనూ దీని పాత్ర ఉంటుందని తేల్చే పరిశోధన ఒకటి జరిగింది. జర్మనీకి చెందిన శాస్త్రవేత్తలు ఉపవాస సమయంలో మన శరీరంలో ఎలాంటి మార్పులు జరుగుతున్నాయో గమనించే ప్రయత్నం చేశారు. రోగ నిరోధక శక్తికి సంబంధించిన కణాలు (ఇమ్యూన్‌ సెల్స్‌), కాలేయానికి సంబంధించిన కణాల మీద ఉపవాసం సానుకూలమైన ప్రభావం చూపినట్టు తేలింది. మన రోగ నిరోధక శక్తిలో వచ్చే మార్పుల వల్లే జీవక్రియలకు (మెటాబాలిజం) సంబంధించి ఎన్నో సమస్యలు వస్తాయి. వాటిలో మధుమేహం ఒకటి. కాబట్టి ఇక మీదట డయాబెటిస్‌ లాంటి దీర్ఘకాలిక సమస్యలకు చికిత్స చేసేటప్పుడు, ఉపవాసం లాంటి ప్రత్యామ్నాయ మార్గాల గురించి కూడా ఆలోచించమని వైద్యులకు సూచిస్తున్నారు శాస్త్రవేత్తలు. డాక్టర్లేనా రోగులూ ఆలోచించాల్సిన విషయం ఇది.