అర్ధ ఉత్తానాసనం : గ‌ర్భిణులు ఈ ఆస‌నం వేస్తే ఇన్ని లాభాలా..

November 10, 2021 / 05:47 AM IST

Yoga | అమ్మకడుపు చల్లగా ఉండాలంటే.. అందుకు తగ్గట్టుగా కొన్ని యోగాసనాలు సాధన చేయాలి. కాబోయే తల్లికి, పుట్టబోయే బిడ్డకు ఉపకరించే ఆసనాలు బోలెడున్నాయి. అందులో ఒకటి అర్ధ ఉత్తానాసనం. దీనిని ఎలా వేయాలంటే..

ముందుగా తాడాసన స్థితిలో నిలబడాలి. రెండు కాళ్ల మధ్య ఒకటి నుంచి ఒకటిన్నర అడుగుల ఎడం ఉండేలా చూసుకోవాలి.
ఇప్పుడు, శ్వాస పీలుస్తూ రెండు చేతులూ పైకి తీసుకోవాలి. అంటే ఊర్ధ్వ హస్తాసన స్థితిలోకి రావాలి.
ఇప్పుడు, శ్వాస వదులుతూ నడుం పై భాగాన్ని చిత్రంలో చూపించిన విధంగా నిదానంగా ముందుకు వంచాలి. రెండు అరచేతులతో కాలి వేళ్లను తాకాలి. సాధ్యం కాకపోతే, పాదాల దగ్గర రెండు ఇటుకలు ఏర్పాటు చేసుకొని, వాటిపై చేతులను ఉంచాలి.
ఈ సమయంలో మీ మోకాళ్లు వంగకుండా చూసుకోవాలి. ఛాతీని విశాలంగా చేసుకొని.. 30 నుంచి 60 సెకండ్ల పాటు ఈ ఆసన
స్థితిలో ఉంటూ నిదానంగా శ్వాసక్రియ కొనసాగించాలి.
చివరగా కాలివేళ్లపై శరీరం బరువు పడేలా ప్రయత్నించాలి.
ఆసనంలో ఉన్నంత సేపూ కాళ్ల మధ్య, చేతుల మధ్య ఉన్న దూరం ఒకేవిధంగా ఉండేలా చూసుకోవాలి.

ప్రయోజనాలు: జీర్ణక్రియకు అనుకూలమైన రసాల ఉత్పత్తిని ప్రోత్సహిస్తుంది. మలబద్ధకాన్ని నివారిస్తుంది. ఉదర సంబంధమైన వ్యవస్థను బలపరుస్తుంది. గర్భసంచిని శిశువుకు సౌకర్యంగా మారుస్తుంది. గర్భస్థ శిశువు పెరుగుదలకు ఊతమిస్తుంది.

చేయకూడని వారు: కండ్లు తిరుగుతున్న వాళ్లు ఈ ఆసనం వేయకూడదు. వ్జైనా నుంచి రక్తస్రావం అవుతున్నా, వాంతులు అవుతున్న ఫీలింగ్‌ ఉన్నా ఈ ఆసనం ప్రయత్నించొద్దు. డాక్టర్‌ సలహా తీసుకున్న తర్వాతే ఆసనం వేయాలి.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి