Nose | నా వయసు ఇరవై. ఎత్తుకు తగిన బరువుతో, తీరైన ఆకృతితో ఆకట్టుకునేలా ఉంటాను. కానీ, నా ముక్కు కోసుకుపోయినట్టు ఉంటుంది. దీంతో అబ్బాయిలు వెక్కిరిస్తుంటారు. ఫలితంగా నా ఆత్మవిశ్వాసం దెబ్బతింటున్నది. సరైన సలహా ఇవ్వగలరు.
ఓ పాఠకురాలు
క్లియోపాత్రా ముక్కు మరోలా ఉంటే.. చాలా యుద్ధాలు జరిగేవే కాదు అంటారు చరిత్రకారులు. నాసికతో మొహానికి కొత్త అందం వస్తుంది. కొందరికి పుట్టుకతో ముక్కు అసహజమైన ఆకృతిలో ఉంటుంది. ప్రమాదాల కారణంగానూ రూపం మారిపోవచ్చు. ముక్కు మీద బొడిపెల్లాంటివి మరింత ఇబ్బంది పెడతాయి. నాసికా రంధ్రాలు మరీ పెద్దగా ఉన్నా ముఖ సౌందర్యం దెబ్బతింటుంది. వీటివల్ల వచ్చే ఆరోగ్య సమస్యలు అటుంచితే.. ప్రధానంగా ఆత్మవిశ్వాసం దెబ్బతింటుంది. డిప్రెషన్లోకి వెళ్లి పోతారు.
ఆత్మహత్య ఆలోచనలు వేధిస్తాయి. ఆధునిక వైద్య విజ్ఞానం ఇలాంటి లోపాల్ని సరిచేసుకోవడానికి అనేక అవకాశాలు ఇచ్చింది. హైలురోనిక్ యాసిడ్ ఫిల్లర్స్ సాయంతో కొన్ని లోపాలను సరిచేస్తారు. నిర్దిష్ట ప్రదేశంలో కొవ్వు పేరుకుపోయి ఉంటే.. దాన్ని పూర్తిగా తొలగించడమో, మరో ప్రాంతానికి తరలించడమో చేయవచ్చు. ముక్కు కొనభాగాన్ని తీర్చిదిద్దడానికి త్రెడ్ లిఫ్ట్ పద్ధతిని ఆశ్రయిస్తారు. ముక్కు పుటాల లోపాలను సరిచేయడంలో బొటాక్స్ సాంకేతికత సాయపడుతుంది. నాన్ సర్జికల్ రైనోప్లాస్టీ ద్వారా నాసిక ఆకృతిని సరిచేయవచ్చు. కానీ ఇది బాహ్య రూపానికే పరిమితం. ముక్కు పనితీరును సరిదిద్దలేదు. సమస్య చిన్నదైనా, పెద్దదైనా.. నిపుణులను సంప్రదించి పరిష్కరించుకోవడం ఉత్తమం.
– డాక్టర్ అనున్యా రెడ్డి ఇ.ఎన్.టి సర్జన్, ఎలర్జీ స్పెషలిస్ట్, ఫేసియల్ కాస్మటిక్ సర్జన్