న్యూయార్క్: బ్రిటిష్ రాచ కుటుంబంలోనూ వర్ణ వివక్ష ఉన్నదంటూ సంచలన ఆరోపణలు చేసిన మేఘన మార్కెల్కు మద్దతుగా నిలిచింది అమెరికన్ టెన్నిస్ స్టార్ సెరెనా విలియమ్స్. ఓప్రా విన్ఫ్రేకు ఇచ్చిన ఈ రెండు గంటల ఇంటర్వ్యూలో ప్రపంచం నివ్వెరపోయే కొన్ని విషయాలను మేఘన్ వెల్లడించింది. తన కొడుకు ఎంత నల్లగా ఉంటాడో అని బకింగ్హామ్ ప్యాలెస్లో చర్చ జరిగిన సందర్భంతోపాటు తనకు ఆత్మహత్య చేసుకోవాలన్న ఆలోచనల వరకూ ఎన్నో అంశాలను ఆమె పంచుకుంది. దీనిపై సెరెనా ఇన్స్టాగ్రామ్ ద్వారా స్పందించింది. నా నిస్వార్థ స్నేహితురాలకి ఈ విషయంలో తాను పూర్తి మద్దతు తెలుపుతున్నానని సెరెనా ఆ పోస్ట్లో స్పష్టం చేసింది.
తన కెరీర్లోనూ ఎన్నోసార్లు వర్ణ వివక్షను ఎదుర్కొన్న సెరెనా.. మేఘన్కు అండగా నిలిచింది. ఆఫ్రికన్-అమెరికన్ అయిన మేఘన్ మార్కెల్.. ప్రిన్స్ హ్యారీని పెళ్లి చేసుకున్న సమయంలో బ్రిటీష్ మీడియా ఆమెతో దారుణంగా వ్యవహరించింది. ఆమెకు వ్యతిరేకంగా ఎన్నో కథనాలు రాసింది. ఇవి చూసే తాను ఆత్మహత్య చేసుకోవాలని అనుకున్నట్లు మేఘన్ తాజా ఇంటర్వ్యూలో వెల్లడించింది. లింగ వివక్ష, వర్ణ వివక్ష ఎంత దారుణంగా ఉంటాయో నాకు తెలుసు. శరీర రంగు ఆధారంగా మహిళలను తక్కువ చేసి అణిచేయడానికి చూస్తారు. మన పిల్లలకు మాత్రం ఈ పరిస్థితి ఉండకూడదు అని సెరెనా తన ఇన్స్టా పోస్ట్లో రాసింది.