వాళ్లు బానిస సంకెళ్ళపై
ఎర్రటి పొద్దు పొడుపై పొడిచారు
సమస్యల భాస్వరాన్ని మండిస్తూ
ఏకత్వ దారాలను బలంగా పేనారు
ప్రశ్నల కొడవళ్ళను విసిరేస్తూ
మాటల ఫిరంగులను పేల్చారు
ఉరికొయ్యలపై ఉయ్యాలలూగుతూ
ఉద్యమాల ఊట చెలిమలను తవ్వారు
తెల్లోడి గుండుకు గుండెను చూపుతూ
వలసవాదులపై ఉరుములై ఉరిమారు
వారి ఊపిరి దీపాలను ఆర్పేసుకొని
మనకు స్వేచ్ఛా కాగడాను అందించారు
వారి జీవితాలను దేశానికి అరణం ఇచ్చి
మనకు స్వాతంత్య్ర ఫలాల తోటను నాటారు
వాళ్ళ రుధిరాలతో ఈ ధరణిని తడిపి
మనకు చైతన్య విత్తనాలను చల్లారు
ఇప్పుడు మనం వారి త్యాగాల గంధాన్ని
ఒళ్ళంతా పూసుకొని కదనరంగమై కదలాలి
వారిచ్చిన స్ఫూర్తి పతాకాన్ని ఎదనిండా
ఎగరేసుకొని దేశ సేవలో మునిగిపోవాలి
మానవత్వపు పూల వంతెనపై నడుస్తూ
కులమత స్తంభాలను కూలదోయాలి
ఐక్యతారాగాన్ని ఆలపిస్తూ
జగతికి దిక్సూచిగా మారాలి