కర్షకుల కన్నీళ్లను తుడవకుంటే

వారి బతుకంతా బరువెక్కిన బాధల గూడే వారి గమనమంతా కన్నీటి పేజీల గాథలే వారి కాయాన్ని ఎక్కడ కదిపినా వ్యథల తూట్లే జిందగీ మొత్తం చెమటచుక్కల అత్తరులే

వారి బతుకంతా బరువెక్కిన బాధల గూడే
వారి గమనమంతా కన్నీటి పేజీల గాథలే
వారి కాయాన్ని ఎక్కడ కదిపినా వ్యథల తూట్లే
జిందగీ మొత్తం చెమటచుక్కల అత్తరులే

మండేసూర్యున్ని నెత్తినెట్టుకొని
ఎముకల గూడుకు బుర్దను పూసుకొని
వరికంకిలా వంగిపోయి ఆరుగాలం కష్టపడి
కంచంలో బువ్వ పూలు పూయించే రైతు
నేడు దళారుల చేతుల్లో శీకిన బొక్కైతాండు
ఏలికల చేతుల్లో చెల్లని ఓటైతాండు

పైరుకు పానం పోసినోడు పాడెక్కుతుంటే
నక్లి ఇత్తనపోళ్ళు ఇంపుగ ఇగురు బెడ్తాండ్రు
ఎలగబెట్తనన్న ఏలికలు ఏండ్లు గడిచినా
సట్టబండలై సడిలేకుండా సాగిపోతుంటే
కర్షకుల కన్నీళ్లు గోదారై పారుతున్నది

పాపం వాళ్లకు రెక్కలు ముక్కలు చేయడం
తెలుసు కానీ మోసపు మాటలు తెలియవు
చెమట చుక్కలు చిందించడం తెలుసు కానీ
తాగిన రొమ్ములను తన్నడం తెలియదు
మట్టిని పిసకడం తెలుసును కానీ
మనుషులను మట్టుపెట్టడం తెలియదు

అన్నదాతను ఆదుకోకుంటే
జగతి శవపేటిక కావడం ఖాయం
కర్షకుల కన్నీళ్లను తుడవకుంటే
ఎవరైనా కాలగర్భంలో కలిసిపోవడం ఖాయం

– తాటిపాముల రమేశ్‌ (తార)
79815 66031