ముక్కోటి వృక్షార్చన

July 24, 2021 / 12:10 AM IST

స్వప్నం ఉదయించడానికి ఒక వేకువ చాలు
మేల్కొలుపులో అది కొత్తరాగం అందుకుంటది
ఆ కల సూర్యుడిదే అయితే
దిక్కులన్నీ పులకరించి
స్వాగత వచనాల్ని పలుకుతయ్‌
ప్రతి హృదయం
తన చెట్టుతనాన్ని ద్విగుణీకృతం చేస్తది
ఇన్నాళ్ల కాలుష్యాన్ని కాటగలిపి
బతుకు జీవుల పంట పండేందుకు
పసిమొక్కల్ని నేలతల్లి ఒడిలో ఎదగనిస్తది
మనసులన్నీ తమ దోసిళ్లలో
పత్రహరితపు పవిత్రతను అంటుగడతవి
పల్లె, పట్నపు ప్రగతిదారులు, ఆవరణాలన్నీ
ముక్కోటి వృక్షార్చనతో
ప్రకృతి సోయగాల కళల్ని
కళ్లముందు నిలుపుకుంటవి
మన తెలంగాణ దేవత
తన సింగిడి వన్నెలకు మెరుపులద్దుకుంటది