ఐజ్వాల్: క్లాస్లో అంతా చూస్తుండగా బాలిక యూనిఫాం విప్పిన టీచర్ను పోలీసులు అరెస్ట్ చేశారు. మిజోరంలోని లుంగ్లీ జిల్లాలో ఈ సంఘటన జరిగింది. తంగ్పుయ్ గ్రామంలోని ప్రభుత్వ ప్రాథమిక పాఠశాలలో లాల్బియాకెంగి అనే మహిళ కాంట్రాక్ట్ టీచర్గా పని చేస్తున్నది. ఈ నెల 22న ఒకటవ తరగతి చదువుతున్న బాలికను క్లాస్లోని ఒక బాలుడు కొట్టాడు. దీంతో ఆ చిన్నారి గాయపడింది. చికిత్స అనంతరం మూడు రోజులకు ఆ బాలిక తిరిగి స్కూల్కు వెళ్లింది. అయితే ఈ నెల 25న కూడా అదే బాలుడు ఆ బాలికను మళ్లీ కొట్టాడు.
కాగా, ఈ విషయం తెలుసుకున్న బాలిక తల్లి శుక్రవారం ఆ స్కూల్కు వెళ్లి నిలదీసింది. తన కుమార్తెను కొట్టిన బాలుడ్ని తిట్టింది. అనంతరం ఇంటికి వెళ్లిన ఆమెకు స్కూల్ టీచర్ లాల్బియాకెంగి ఫోన్ చేసింది. బాలుడ్ని తిట్టిన ఆమె స్కూల్ నిబంధనలను ఉల్లంఘించినట్లు ఆరోపించింది.
ఆగ్రహించిన ఆ మహిళ వెంటనే ఆ ప్రభుత్వ స్కూల్కు వెళ్లింది. తన కుమార్తెను వేరే స్కూల్లో చేరుస్తానని చెప్పింది. అయితే ఆ బాలిక స్కూల్ యూనిఫాం విడిచి వెళ్లాలని, మరో విద్యార్థికి ఆ యూనిఫాం అవసరం ఉందని టీచర్ లాల్బియాంకెంగి చెప్పింది. ఈ నేపథ్యంలో క్లాస్లోనే అందరి ముందు ఆ చిన్నారి స్కూల్ డ్రెస్ను ఆ టీచర్ విప్పింది. ఆ బాలికను కేవలం అండర్వేర్తో స్కూల్ నుంచి ఇంటికి పంపింది.
మరోవైపు ఈ వీడియో సోషల్ మీడియాలో వైరల్ అయ్యింది. దీంతో ఆ రాష్ట్ర పిల్లల సంక్షేమ కమిటీ ఈ సంఘటనపై స్పందించింది. బాలిక పట్ల అమానుషంగా ప్రవర్తించడంతోతోపాటు క్లాస్లోని మిగతా విద్యార్థుల ముందు స్కూల్ యూనిఫాం తొలగించి అండర్వేర్తో ఇంటికి పంపిన ఆ టీచర్పై పోలీసులకు ఫిర్యాదు చేసింది. దీంతో టీచర్ లాల్బియాంకెంగిని పోలీసులు శనివారం అరెస్ట్ చేశారు.