Lottery Scam : తండ్రీకొడుకుల మోసం.. 157 కోట్లు ముంచారు..

Lottery Scam : చిన్నారులకు సాయం పేరుతో వేలాది లాటరీ టిక్కెట్లపై తండ్రీకొడుకులు పన్ను ఎగవేశారు. ఎనిమిదేండ్లుగా...

August 25, 2021 / 05:46 PM IST

Lottery Scam : తండ్రీకొడుకుల మోసం.. 157 కోట్లు ముంచారు..

వాషింగ్టన్‌ : మోసం చేయాలనే బలమైన కోరిక ఉంటే.. అది ఎక్కడైనా, ఏ విధంగానైనా చేస్తుంటారు. దానికి దోస్తులే కానక్కరలేదు. తండ్రీకొడుకులైనా చేసేయగలరు. అచ్చం ఇలాంటి కేసు ఒకటి అమెరికాలోని మసాచుసెట్స్‌లో బయటపడింది. చిన్నారులకు సాయం పేరుతో వేలాది లాటరీ టిక్కెట్లపై తండ్రీకొడుకులు (Lottery Scam) పన్ను ఎగవేశారు. ఎనిమిదేండ్లుగా తమ మోసాలను నిరాటంకంగా కొనసాగించి జల్సాలు చేశారు. ఈ సమయంలో వారు దాదాపు రూ.157 కోట్ల మేర మోసం చేశారంటే.. వారి దొంగ బుద్ధిని మెచ్చుకోకుండా ఉండలేం. ఇటీవలనే ఈ కేసు కోర్టు దాకా వచ్చింది.

అమెరికాలోని మసాచుసెట్స్‌లో నివసించే అలీ జాఫర్‌, అతడి కుమారులు మొహమ్మద్‌, యూసుఫ్‌.. చిన్నారులకు సాయం పేరుతో లాటరీ విజేతల నుంచి టిక్కెట్లు తీసుకునేవారు. విజేతలకు కొంత మినహాయించుకుని నగదు చెల్లించేవారు.ఇలా ఎనిమిదేండ్లలో వారు దాదాపు 13,000 కంటే ఎక్కువ లాటరీ టిక్కెట్లను నగదు చేసుకుని తండ్రీకొడుకులు.. పిల్లలకు సహాయం పేరుతో పన్నులు, ఇతర మినహాయింపులను ఎగవేసినట్లు పోలీసులు గుర్తించారు. వీరిపై రూ.157 కోట్ల మేర మోసం చేసినట్లు అభియోగాలు మోపారు. ఈ కేసు మసాచుసెట్స్‌లోని యూఎస్ జిల్లా కోర్టులో జాఫర్, అతని కుమారులపై 19 పేజీల ఛార్జ్ షీట్ దాఖలైంది. ఇందులో వీరిపై మనీలాండరింగ్, పన్ను ఎగవేతకు సంబంధించి డజనుకు పైగా కేసులు ఉన్నాయి.