Visit:
World Of Nilakanta | కొత్త ఏడాది సంక్రాంతి సందడి మొదలవ్వకముందే టాలీవుడ్లో ఒక ఆసక్తికరమైన యాక్షన్ డ్రామా ప్రేక్షకుల ముందుకు రాబోతోంది. మాస్టర్ మహేంద్రన్ హీరోగా నటించిన ‘నీలకంఠ’ చిత్రం జనవరి 2న ప్రపంచవ్యాప్తంగా భారీ స్థాయిలో విడుదల కానుంది. సామాజిక అన్యాయం, కుల వివక్ష నేపథ్యంలో సాగే ఈ చిత్రానికి రాకేష్ మాధవన్ దర్శకత్వం వహించారు. ఇప్పటికే ప్రమోషనల్ కంటెంట్తో పాజిటివ్ టాక్ సంపాదించుకున్న ఈ సినిమా ట్రైలర్ను యంగ్ హీరో కిరణ్ అబ్బవరం విడుదల చేశారు. “వరల్డ్ ఆఫ్ నీలకంఠ” పేరుతో విడుదలైన ఈ ట్రైలర్ ఆద్యంతం ఇంటెన్స్ యాక్షన్ సీక్వెన్స్లు, ఎమోషనల్ డైలాగులతో పవర్ఫుల్ గా సాగింది. కిరణ్ అబ్బవరం ఈ ట్రైలర్ను సోషల్ మీడియా వేదికగా షేర్ చేస్తూ చిత్ర బృందానికి ప్రత్యేకంగా అభినందనలు తెలియజేశారు. ఆయన మద్దతు సినిమాకు పెద్ద ప్లస్ పాయింట్ అవుతుందని సినీ విశ్లేషకులు భావిస్తున్నారు.
ప్రముఖ దర్శకుల ప్రశంసలు
కేవలం కిరణ్ అబ్బవరం మాత్రమే కాకుండా, టాలీవుడ్ ప్రముఖ దర్శకులు శివ నిర్వాణ, అజయ్ భూపతి కూడా ఈ సినిమాపై ప్రశంసల జల్లు కురిపించారు. సినిమా కాన్సెప్ట్ మరియు మేకింగ్ స్టైల్ చాలా బాగుందని, టీమ్ అందరికీ ఆల్ ది బెస్ట్ చెబుతూ వారు సోషల్ మీడియాలో పోస్ట్లు చేశారు. ఈ వరుస మద్దతుతో సినిమాపై అంచనాలు ఒక్కసారిగా పెరిగాయి. ఎల్ఎస్ ప్రొడక్షన్స్ బ్యానర్పై మర్లపల్లి శ్రీనివాసులు, వేణుగోపాల్ నిర్మించిన ఈ చిత్రం తెలుగు, హిందీ, తమిళ్, కన్నడ, మలయాళ భాషల్లో పాన్ ఇండియా మూవీగా రిలీజ్ అవుతోంది.
మాస్టర్ మహేంద్రన్, యష్నా చౌదరి, నేహా పఠాన్ ప్రధాన పాత్రల్లో నటిస్తుండగా.. రాంకీ, బబ్లూ పృథ్వీ, శుభలేఖ సుధాకర్, చిత్రం శీను ముఖ్య పాత్రల్లో నటిస్తున్నారు. సీనియర్ హీరోయిన్ స్నేహా ఉల్లాల్ ఈ సినిమాలో ఒక ప్రత్యేక పాత్రలో మెరవబోతున్నారు.
ఈ సినిమా కథ విషయానికి వస్తే.. సమాజంలో అణచివేతకు గురైన ఒక యువకుడు, కుల వివక్షకు వ్యతిరేకంగా చేసే పోరాటం, తన వారి కోసం తీర్చుకునే ప్రతీకారం చుట్టూ ఈ కథ తిరుగుతుంది. యాక్షన్ ప్రియులకు మాత్రమే కాకుండా, సామాజిక అంశాలను ఇష్టపడే ప్రేక్షకులకు కూడా ఈ సినిమా నచ్చుతుందని చిత్ర యూనిట్ ధీమా వ్యక్తం చేస్తోంది. సంక్రాంతి రేసు కంటే ముందే జనవరి 2న థియేటర్లలోకి వస్తున్న ఈ ‘నీలకంఠ’ బాక్సాఫీస్ వద్ద ఎలాంటి ప్రభావాన్ని చూపుతుందో చూడాలి!
