Waltair Veerayya Firstday Collections | మెగా అభిమానులతో పాటు, ప్రేక్షకులు కూడా ఎంతగానో ఎదురు చూస్తున్న ‘వాల్తేరు వీరయ్య’ శుక్రవారం రిలీజై పాజిటీవ్ టాక్తో దూసుకుపోతుంది. వింటేజ్ చిరు ఈజ్ బ్యాక్ అంటూ అభిమానులు వీరయ్య సక్సెస్ను పండగలా జరుపుకుంటున్నారు. సంక్రాంతి పండగ ఒక రోజు ముందుగానే వచ్చిందంటూ థియేటర్లలో సంబురాలు చేసుకుంటున్నారు. నిజానికి ఈ సినిమాపై ముందు నుండి మంచి బజ్ ఉంది. దానికి తోడు ‘గ్యాంగ్లీడర్’, ‘ఘరానా మొగుడు’ సినిమాల ఛాయలు పోస్టర్లు, ట్రైలర్లలో కనిపించడంతో ప్రేక్షకుల్లో విపరీతమైన ఆసక్తి నెలకొంది.
పైగా మాస్ మహరాజా రవితేజ ఈ సినిమాలో కీలకపాత్ర పోషించడంతో అంచనాలు తారా స్థాయికి చేరాయి. రొటీన్ కథే అని ముందే తెలిసిన బాబీ.. ఈ సినిమాను ఏ విధంగా మలిచాడు. చిరు, రవన్నలను ఎలా చూపించాడు అనే ఆసక్తితో ప్రేక్షకులు థియేటర్లకు పరుగులు పెడుతున్నారు. భారీ అంచనాల నడుమ రిలీజైన ఈ సినిమా అంచనాలకు తగ్గట్లే మొదటి రోజు రూ.29 కోట్లకు పైగా షేర్ సాధించి సంచలనం సృష్టించాడు. చిరు గత చిత్రం గాడ్ఫాదర్ మొదటి రోజు రూ.13 కోట్ల వరకు కలెక్ట్ చేస్తే.. వాల్తేరు దానికి రెండింతలు వసూలు చేసి ట్రేడ్ వర్గాలను సైతం ఆశ్చర్యంలో పడేసింది.
రెండో రోజు కూడా బుకింగ్స్ భారీ రేంజ్లో ఉన్నాయి. కాగా ఈ సినిమా ప్రభావం వీరసింహాపై గట్టిగా పడింది. తోలి రోజు రూ.25 కోట్ల షేర్ సాధించిన వీరసింహా రెండవరోజు కేవలం రూ.8 కోట్లతోనే సరిపెట్టుకుంది. వాల్తేరు వీరయ్య దెబ్బకు సగానికి పైగా డ్రాప్స్ పడ్డాయి. ఇక శనివారం వారసుడు విడుదలైంది. ఈ సినిమాకు ఫ్యామిలీ ఆడియోన్స్ నుండి మంచి రెస్పాన్స్ వస్తుంది. ఇక సంక్రాంతి వీక్ అయ్యేలోపు ఎవరు ముందంజలో ఉంటారో చూడాలి.