Visit:
Vishwak Sen | టాలీవుడ్ ప్రముఖ నిర్మాత అల్లు అరవింద్, మాస్ కా దాస్ విశ్వక్ సేన్ ఒకే వేదికపై కనిపిస్తే వినోదానికి కొదవ ఉండదని మరోసారి నిరూపితమైంది. తాజాగా దీవానా సినిమా ప్రమోషన్స్లో భాగంగా నిర్వహించిన ఈవెంట్లో వీరిద్దరి మధ్య జరిగిన సరదా సంభాషణలు ప్రేక్షకులను కడుపుబ్బా నవ్వించాయి. ప్రత్యేకంగా విశ్వక్ సేన్ అడిగిన ప్రశ్నలు, వాటికి అల్లు అరవింద్ ఇచ్చిన సమాధానాలు సోషల్ మీడియాలో వైరల్గా మారాయి. ఈవెంట్లో మాట్లాడిన విశ్వక్ సేన్, గీతా ఆర్ట్స్ నిర్మాతలపై సరదాగా వ్యాఖ్యలు చేశారు. సాధారణంగా నిర్మాతలు ఎక్కువ సినిమాలు చేస్తే ఒత్తిడితో జుట్టు ఊడిపోతుంది. కానీ గీతా ఆర్ట్స్ వాళ్లు మాత్రం ఎప్పుడూ యంగ్గా, స్టైలిష్గా కనిపిస్తున్నారు. ఆ సీక్రెట్ ఏంటో చెప్పాలి అంటూ ప్రశ్నించారు.
దీనికి స్పందించిన అల్లు అరవింద్ చిరునవ్వుతో స్పందించగా, సభలో నవ్వులు పూశాయి. గీతా ఆర్ట్స్కు చెందిన యువ నిర్మాతలు కూడా చాలా యాక్టివ్గా, స్మార్ట్గా కనిపిస్తున్నారని విశ్వక్ సరదాగా వ్యాఖ్యానించారు. అవసరమైతే నా తొలి సినిమా రోజుల్లా మళ్లీ ఆడిషన్ ఇస్తాను. కానీ మీ బ్యానర్లో ఒక సినిమా చేసే అవకాశం ఇవ్వండి అని అన్నారు. దీనికి అల్లు అరవింద్ వెంటనే స్పందిస్తూ, “ఈ మధ్య నువ్వు రెమ్యూనరేషన్ ఎక్కువ అడుగుతున్నావు” అంటూ సరదా కౌంటర్ ఇచ్చారు. అదే జోష్లో విశ్వక్ సేన్, మీ దగ్గర డబ్బులు బాగానే ఉన్నాయి సార్. మాలాంటి వాళ్లకు కూడా కొంచెం పంచండి. ఈ థియేటర్ కూడా మీదే, మీరు కూర్చున్న కుర్చీ కూడా మీదే అంటూ చమత్కరించారు. దీంతో సభలో నవ్వుల సందడి నెలకొంది.
ఈ సందర్భంగా మరో ఆసక్తికర ప్రతిపాదన కూడా చేశారు విశ్వక్. హైదరాబాద్లోని దిల్సుఖ్నగర్ ప్రాంతంలో స్టూడియో నిర్మించాలని, అవసరమైతే తన స్థలం కూడా ఇస్తానని సరదాగా అల్లు అరవింద్కు సూచించారు. ఈ వ్యాఖ్యలు కూడా అభిమానులను అలరించాయి. ‘దీవానా’ చిత్రానికి “వన్ సైడ్ లవ్” అనే ట్యాగ్లైన్ ఉండటంతో, విశ్వక్ సేన్ మరో ఆసక్తికర ప్రశ్న వేశారు.సార్.. మీ జీవితంలో వన్ సైడ్ లవ్ స్టోరీస్ ఏమైనా ఉన్నాయా? అని అడిగారు. దీనికి స్పందించిన అల్లు అరవింద్, “ఒకటా.. రెండా..? లెక్కలేనన్ని ఉన్నాయి” అంటూ సమాధానం ఇవ్వడంతో ప్రేక్షకులు ఆశ్చర్యపోయారు. ఆయన సమాధానం విన్న వెంటనే సభలో నవ్వులు వెల్లువెత్తాయి. ఆ తర్వాత ప్రస్తుత తరం ప్రేమ కథలపై అల్లు అరవింద్ చేసిన వ్యాఖ్యలు సోషల్ మీడియాలో విపరీతంగా వైరల్ అవుతున్నాయి.
ఇప్పుడు లవ్ స్టోరీ అంటే ఖాళీగా ఉన్న థియేటర్లకు వెళ్లడం, షాపింగ్ చేయడం, చివరికి ఓయో రూమ్లో ముగియడం… ఇదే కదా ఇప్పుడు చాలామంది చెప్పే ప్రేమకథ అంటూ ఆయన చేసిన వ్యాఖ్యలు సోషల్ మీడియాలో పెద్ద ఎత్తున చర్చకు దారితీశాయి. ఈ ఈవెంట్లో జరిగిన సరదా సంభాషణల వీడియోలు ప్రస్తుతం సోషల్ మీడియాలో వైరల్ అవుతున్నాయి. ముఖ్యంగా విశ్వక్ సేన్ చమత్కారాలు, అల్లు అరవింద్ ఇచ్చిన స్పాంటేనియస్ సమాధానాలు నెటిజన్లను ఆకట్టుకుంటున్నాయి.
