Sankranthiki vasthunnam | అప్పుడే రోజంతా హాయిగా ఉంటుంది!

‘జయాపజయాల గురించి నేను అంతగా పట్టించుకోను. కెరీర్‌లో ఎన్నో విజయాలు చూశాను. ఇన్నేళ్ల సినీ ప్రయాణంలో కూడా నేను నిత్య విద్యార్థినే అనుకుంటున్నా. ప్రతీ సినిమాకు కొత్తగా ఏదో ఒకటి నేర్చుకుంటున్నా.

Sankranthiki vasthunnam | ‘జయాపజయాల గురించి నేను అంతగా పట్టించుకోను. కెరీర్‌లో ఎన్నో విజయాలు చూశాను. ఇన్నేళ్ల సినీ ప్రయాణంలో కూడా నేను నిత్య విద్యార్థినే అనుకుంటున్నా. ప్రతీ సినిమాకు కొత్తగా ఏదో ఒకటి నేర్చుకుంటున్నా. సినిమా ఫలితం గురించి ఆలోచించకుండా నాకు అప్పజెప్పిన పనిని వందశాతం అంకితభావంతో నిజాయితీగా పూర్తి చేయాలన్నదే నా సిద్ధాంతం’ అన్నారు అగ్ర నటుడు వెంకటేష్‌. ఆయన కథానాయకుడిగా అనిల్‌ రావిపూడి దర్శకత్వంలో దిల్‌రాజు నిర్మించిన ‘సంక్రాంతికి వస్తున్నాం’ ఈ నెల 14న ప్రేక్షకుల ముందుకురానుంది ఈ సందర్భంగా శనివారం ఏర్పాటు చేసిన సమావేశంలో వెంకటేష్‌ పాత్రికేయులతో ముచ్చటించారు. ఆ విశేషాలు ఆయన మాటల్లోనే..

• సంక్రాంతికి చక్కటి వినోదాత్మక చిత్రంతో ప్రేక్షకుల ముందుకురావడం ఆనందంగా ఉంది. ఈ కథలో చిన్న క్రైమ్‌ ఎలిమెంట్‌ కూడా ఉండటంతో కొన్ని సన్నివేశాలు ఉత్కంఠభరితంగా సాగుతాయి. మాజీ పోలీస్‌, అతని భార్య, మాజీ ప్రేయసి మధ్య ఆసక్తికరంగా నడిచే క్రైమ్‌ ఫ్యామిలీ డ్రామా ఇది. ఆద్యంతం వినోదంతో పాటు అక్కడక్కడా ఉత్కంఠను కలిగించే సన్నివేశాలతో ఈ సంక్రాంతికి పర్‌ఫెక్ట్‌ మూవీ అనిపించుకుంటుంది.
• ఎన్నడూలేనంతగా ఈ సినిమా ప్రమోషన్స్‌లో ఎక్కువగా పాల్గొన్నానని చాలా మంది అంటున్నారు. అది అనుకోకుండా జరిగింది. ఈ సినిమా మ్యూజిక్‌ బాగా వచ్చింది. స్వతహాగా నాకు డ్యాన్సులు ఇష్టం ఉండటంతో.. ట్యూన్స్‌ వినగానే జోష్‌ అనిపించింది. అందుకే ప్రమోషన్‌ కార్యక్రమాల్లో మా టీంతో పాటు నేను కూడా ఉత్సాహంగా పాల్గొన్నా. చక్కటి డ్యా న్సులు, సరదా సంగతులతో ప్రమోషనల్‌ ఈవెంట్స్‌ బాగా జరిగాయి.
• ‘గోదారి గట్టు’ పాట 85 మిలియన్‌ వ్యూస్‌ క్రాస్‌ చేయడం ఆనందంగా ఉంది. భీమ్స్‌ బెస్ట్‌ మ్యూజిక్‌ ఇచ్చాడు. ఇందులో నేను పాడిన ‘పొంగల్‌’ సాంగ్‌కు మంచి రెస్పాన్స్‌ వస్తున్నది. రాత్రి రెండు గంటలకు ఆ పాట విన్నప్పుడు తెలియకుండానే డ్యాన్స్‌ చేశాను. ఆ పాట చాలా క్రేజీగా అనిపించింది. దాంతో నేను పాడతానని చెప్పా. నేను పాడిన రోజు నా గొంతు బాగుంది. ఇంగ్లీష్‌ పదాలు ఎక్కువగా ఉండటంతో పాట ఈజీ అయ్యింది (నవ్వుతూ).
• ‘సీతమ్మ వాకిట్లో సిరిమల్లె చెట్టు’ సినిమా నుంచి దిల్‌రాజుగారితో నా ప్రయాణం కొనసాగుతున్నది. వారి బ్యానర్‌లో సినిమా చేయడం చాలా కంఫర్టబుల్‌గా ఉంటుంది. మేమిద్దరం కలిసి చేసిన సినిమాలన్నీ బాగా ఆడాయి. నాన్నగారి సినిమాల ప్రొడక్షన్స్‌ వ్యవహారాలు చూసిన అనుభవం ఉండటం వల్ల నిర్మాతల కష్టనష్టాలపై మంచి అవగాహన ఉంది. అందుకే ఏ బ్యానర్‌లో నటించినా సొంత సంస్థలాగానే భావిస్తా. అందరూ హ్యాపీగా ఉండాలని కోరుకుంటా.
• పాజిటివ్‌ ఆలోచనతో రోజు మొదలుపెడితే ఆ రోజంతా హాయిగా ఉంటుంది. మన ఆధీనంలో లేని విషయాల గురించి ఎక్కువగా ఆలోచించొద్దన్నదే నా ఫిలాసఫీ. ఈ విషయాన్ని ఎప్పుడూ చెబుతుంటాను. మన వృత్తి విషయంలో నిజాయితీ, నిబద్దతతో ఉంటే చాలు. ఫలితం గురించి ఎక్కువగా ఆలోచించొద్దు. ‘రానా నాయుడు-2’ మార్చిలో రావొచ్చు. డబ్బింగ్‌ పూర్తయింది. నా తదుపరి సినిమాలకు సంబంధించిన కథా చర్చలు జరుగుతున్నాయి. అన్నీ ఫైనలైజ్‌ అయ్యాక వివరాలను వెల్లడిస్తా.