మీ వేదిక.. చాలా బిజీ

ముంబయిలో పుట్టి, పెరిగిన అందం వేదిక. చిన్నప్పటి నుంచి నటనపై ఆసక్తి ఉండటంతో గ్లామర్‌ ఫీల్డ్‌వైపు అడుగులు వేసింది. కుటుంబంలో కన్నడ మూలాల కారణంగా.. దక్షిణాది చిత్రసీమపై కన్నేసింది. తమిళ చిత్రం ‘మద్రాసీ’తో కెరీర్‌ మొదలుపెట్టింది.

ముంబయిలో పుట్టి, పెరిగిన అందం వేదిక. చిన్నప్పటి నుంచి నటనపై ఆసక్తి ఉండటంతో గ్లామర్‌ ఫీల్డ్‌వైపు అడుగులు వేసింది. కుటుంబంలో కన్నడ మూలాల కారణంగా.. దక్షిణాది చిత్రసీమపై కన్నేసింది. తమిళ చిత్రం ‘మద్రాసీ’తో కెరీర్‌ మొదలుపెట్టింది. తెలుగు, కన్నడ, మలయాళ భాషా చిత్రాల్లోనూ నటించి దక్షిణాది తారగా ఎదిగింది. ఆశించిన స్థాయిలో అవకాశాలు రాకపోయినా.. వచ్చినదాన్ని మాత్రం బలంగా పట్టుకొని, తానేంటో నిరూపించుకుంది. ‘ముని’, ‘పరదేశి’, ‘శివలింగ’, ‘కాంచన 3’ తదితర హిట్‌ చిత్రాల్లో నటించి మెప్పించింది. ప్రస్తుతం ఏడు సినిమాలతో బిజీగా ఉన్నానంటున్న వేదిక కెరీర్‌ ముచ్చట్లు ఇవి..

దక్షిణాదిపరిశ్రమలోని టాప్‌ స్టార్లతో స్క్రీన్‌ షేర్‌ చేసుకున్నా. పృథ్వీరాజ్‌, శింబు, సిద్ధార్థ్‌, సూర్య, బాలకృష్ణ, ప్రభుదేవా, శివరాజ్‌ కుమార్‌, ఉపేంద్ర .. ఇలా పెద్ద పెద్ద హీరోలతో
నటించడం గొప్పగా భావిస్తున్నా.

• చిన్నప్పటి నుంచి నాకు డ్యాన్స్‌ అంటే ఇష్టం. స్కూల్‌లో జరిగే పోటీల్లో చురుగ్గా పాల్గొనేదాన్ని. కథలు, ఆటలు, పాటలు ఇలా అన్నిట్లో నా పేరు ఉండాల్సిందే! అంతేకాదు పెద్దయ్యాక హీరోయిన్‌ కావాలని బలంగా కోరుకునేదాన్ని. అనుకున్నది సాధించాను కూడా.
• దక్షిణాది చిత్రసీమకు రుణపడి ఉంటాను. నాకు వరుస అవకాశాలు ఇచ్చి అక్కున చేర్చుకుంది. ఇప్పటివరకూ నా కెరీర్‌లో 13సార్లు ఉత్తమ నటి కేటగిరీలో నామినేట్‌ అయ్యాను. ఏడుసార్లు ఆ పురస్కారాన్ని అందుకున్నాను. నాకు ఇంతటి అదృష్టాన్ని కలిగించిన దర్శకులకు ఎప్పటికీ రుణపడి ఉంటా. చాలామంది దర్శకులు నాకు మంచి పాత్రలు ఇచ్చి నటిగా నిల
  బెట్టారు. బాలా దర్శకత్వంలో వచ్చిన ‘పరదేశి’ చిత్రం నాకు మంచి గుర్తింపు తెచ్చింది. ఆ సినిమాలోని నా పాత్ర గురించి ఇంకా మాట్లాడుకుంటారు.
• అవకాశాన్ని అదృష్టంగా భావించను. దాన్ని సవాలుగా తీసుకుంటాను. నాకు ఇచ్చిన పాత్రకు నూరు శాతం న్యాయం చేయడమే నా లక్ష్యం. ఈ క్రమంలో ఎన్నో కొత్త విషయాలు తెలుసుకోవచ్చు. ఇండస్ట్రీలోకి వచ్చాక తెలుగు, తమిళం, కన్నడం నేర్చుకున్నా. ఇప్పుడు మలయాళం నేర్చుకుంటున్నా. భాషమీద కనుక పట్టు దొరికితే భావాన్ని మరింత స్పష్టంగా పలికించగలం.
• విహారయాత్రలు చేయడం నా అభిరుచి. ప్రతిసారీ ఓ కొత్త ప్రదేశం చూడాలని కోరుకుంటాను. షూటింగ్స్‌ లేనప్పుడు మాల్దీవులు వెళ్లిపోతా. మనకు సమీపంలో ఉన్న భూతల స్వర్గంగా అనిపిస్తుంది. ఏ ప్రదేశానికి వెళ్లినా అక్కడి సంస్కృతి, సంప్రదాయాలు తెలుసుకునే ప్రయత్నం చేస్తా.
• షూటింగ్స్‌ లేకపోతే ఒంటరిగా గడపడానికి ప్రాధాన్యమిస్తా. నా రోజు ధ్యానంతో మొదలవుతుంది. పుస్తకాలు చదవడం అంటే ఆసక్తి. ఇంట్లో ఉంటే.. నా కుక్కపిల్ల ఆస్కార్‌తోనే సమయం గడిచిపోతుంది. షూటింగ్‌ నుంచి ఇంటికి రాగానే.. దాంతో ఉంటే ఒత్తిడంతా ఇట్టే ఎగిరిపోతుంది.
• అనుకున్నట్టుగానే సినిమా ఫీల్డ్‌లోకి వచ్చాను. వచ్చిన అవకాశాలను సద్వినియోగం చేసుకున్నాననే అనుకుంటున్నాను. ఇండస్ట్రీలోకి ఎందుకొచ్చానా? అని బాధపడిన సందర్భాలు ఇప్పటివరకైతే రాలేదు. ఎక్కడైనా గెలుపోటములు సహజం. ఈ ఫీల్డ్‌లోనూ అంతే! ఇక విమర్శలు ఎటూ ఉండేవే.
• ఇప్పుడు నా చేతిలో ఏడు సినిమాలు ఉన్నాయి. ఒక వెబ్‌సిరీస్‌లో నటిస్తున్నా. తెలుగులో నిర్మిస్తున్న ఈ సిరీస్‌లో టైటిల్‌ రోల్‌ పోషిస్తున్నా. ‘మహల్‌’ అనే తమిళ చిత్రంలో ప్రధాన పాత్రలో నటిస్తున్నా. ప్రభుదేవా ‘పెటరాప్‌’ సినిమాలోనూ లీడ్‌రోల్‌లో కనిపిస్తా. తెలుగులో ‘రజాకార్‌’ చిత్రం చేస్తున్నా. కన్నడంలోనూ ఒక చిత్రం షూటింగ్‌ దశలో ఉంది. మొత్తంగా బిజీబిజీగా ఉన్నా.