Ram Charan | మైఖేల్ జాక్సన్, బ్రిట్నీ స్పియర్స్‌తో ప్లాన్ చేసిన శంక‌ర్.. తెరపైకి రాని ఆ రెండు కలయికలు!

Ram Charan | సినీ పరిశ్రమలో విజయాలు, పరాజయాలు సహజమే. అయితే ఒక దర్శకుడు తన సినిమాల కోసం ఆలోచించే విధానం, ఊహించే స్థాయి, కథను తెరపై ఆవిష్కరించాలనుకునే తీరు.. అతడి దృష్టి ఎంత విస్తృతంగా ఉందో చెబుతాయి. అలాంటి దర్శకుల్లో శంకర్ ఒకరు. భారీ కథలు, అద్భుతమైన దృశ్యాలు, సరికొత్త ఆలోచనలకు పెట్టింది పేరైన శంకర్ గురించి తాజాగా సంగీత దర్శకుడు తమన్ చేసిన వ్యాఖ్యలు ఆసక్తిని రేకెత్తిస్తున్నాయి.

Ram Charan | సినీ పరిశ్రమలో విజయాలు, పరాజయాలు సహజమే. అయితే ఒక దర్శకుడు తన సినిమాల కోసం ఆలోచించే విధానం, ఊహించే స్థాయి, కథను తెరపై ఆవిష్కరించాలనుకునే తీరు.. అతడి దృష్టి ఎంత విస్తృతంగా ఉందో చెబుతాయి. అలాంటి దర్శకుల్లో శంకర్ ఒకరు. భారీ కథలు, అద్భుతమైన దృశ్యాలు, సరికొత్త ఆలోచనలకు పెట్టింది పేరైన శంకర్ గురించి తాజాగా సంగీత దర్శకుడు తమన్ చేసిన వ్యాఖ్యలు ఆసక్తిని రేకెత్తిస్తున్నాయి. శంకర్ దర్శకత్వంలో వచ్చిన రెండు సినిమాల కోసం ప్రపంచ సంగీత రంగంలోని దిగ్గజాలతో భారీగా పని చేయాలనే ప్రణాళికలు ఉన్నాయని తమన్ వెల్లడించారు.

శంకర్ దర్శకత్వంలో రజనీకాంత్ హీరోగా తెరకెక్కిన ‘ఎంథిరన్’ సినిమా అప్పట్లో భారతీయ చిత్ర పరిశ్రమలోనే ఒక సంచలనంగా నిలిచింది. ఈ సినిమాకు ఏఆర్ రెహమాన్ సంగీతం అందించారు. అయితే ఈ చిత్రానికి సంబంధించి ఇంతవరకు పెద్దగా బయటకు రాని ఒక ఆసక్తికరమైన విషయం తాజాగా వెలుగులోకి వచ్చింది. ‘ఎంథిరన్’లోని ఓ పాట కోసం ప్రపంచ ప్రఖ్యాత పాప్ గాయకుడు మైఖేల్ జాక్సన్‌తో కలిసి పనిచేయాలని ఏఆర్ రెహమాన్ భావించారట. తమన్ వెల్లడించిన వివరాల ప్రకారం.. ‘ఎంథిరన్’ కోసం మైఖేల్ జాక్సన్‌తో ఒక ప్రత్యేక సహకారం గురించి చర్చలు జరిగాయి. 2009 మేలో ఈ ప్రాజెక్టుకు సంబంధించిన ప్రణాళిక దాదాపుగా ఖరారైనట్లు తెలుస్తోంది. ప్రపంచవ్యాప్తంగా అభిమానులను కలిగిన మైఖేల్ జాక్సన్, భారతీయ సూపర్‌స్టార్ రజనీకాంత్ సినిమా కోసం పనిచేయడం జరిగి ఉంటే అది అంతర్జాతీయ స్థాయిలోనే ఒక ప్రత్యేక సంగీత కలయికగా నిలిచేది.

అయితే ఆ కలయిక కార్యరూపం దాల్చలేదు. 2009 జూన్‌లో మైఖేల్ జాక్సన్ అనూహ్యంగా కన్నుమూయడంతో ఈ ప్రాజెక్ట్ అక్కడితో ఆగిపోయింది. తమన్ చెప్పిన మరో ఆసక్తికరమైన విషయం రామ్ చరణ్, కియారా అద్వానీ జంటగా నటించిన ‘గేమ్ ఛేంజర్’ సినిమాకు సంబంధించినది. శంకర్ దర్శకత్వం వహించిన ఈ చిత్రానికి తమన్ సంగీతం అందించారు. సినిమాలోని ‘ధోప్’ పాటను అంతర్జాతీయ స్థాయిలో మరో విధంగా తీసుకెళ్లేందుకు చిత్ర బృందం ఒక భారీ ప్రణాళిక వేసిందట. ‘ధోప్’ పాటకు ఆంగ్ల వెర్షన్ రూపొందించి, దానిని అంతర్జాతీయంగా విడుదల చేయాలని భావించినట్లు తమన్ తెలిపారు. అంతేకాదు.. ఆ పాటకు బ్రిట్నీ స్పియర్స్‌ను ప్రత్యేక ఆకర్షణగా తీసుకురావాలనే ఆలోచన కూడా ఉందట. ప్రపంచ పాప్ సంగీతంలో తనకంటూ ప్రత్యేక గుర్తింపు తెచ్చుకున్న బ్రిట్నీ స్పియర్స్ ఈ పాటలో భాగమై ఉంటే ‘గేమ్ ఛేంజర్’కు అంతర్జాతీయ స్థాయిలో మరింత ప్రచారం లభించే అవకాశం ఉండేది.అయితే సినిమా నిర్మాణంలో చోటుచేసుకున్న ఆలస్యాలు, ఇతర షెడ్యూల్ సమస్యల కారణంగా ఈ ప్రణాళిక ముందుకు సాగలేదని తమన్ వెల్లడించారు.