Jawan Movie | షారుఖ్‌ ఖాన్‌ ‘జ‌వాన్‌’లో త‌మిళ స్టార్ హీరో?

Shah Rukh khan-Atlee’s Jawan Movie | తమిళ ద‌ర్శ‌కుడు అట్లీ తెలుగు ప్రేక్ష‌కుల‌కు సుప‌రిచిత‌మే. ప్ర‌ముఖ ద‌ర్శ‌కుడు ఏ.ఆర్ మురుగదాస్ ద‌గ్గ‌ర అసిస్టెంట్ డైరెక్ట‌ర్‌గా ప‌నిచేసి.. మొద‌టి సినిమా ‘రాజారాణి’కి ఆయ‌న్నే నిర్మాత‌గా పెట్టి బ్లాక్ బాస్ట‌ర్ హిట్‌ను కొట్టాడు. ఆ త‌రువాత వ‌రుస‌గా విజ‌య్‌తో ‘పోలీసోడు’, ‘అదిరింది’, ‘విజిల్’ వంటి బ్లాక్ బ‌స్ట‌ర్ హిట్ల‌తో కోలీవుడ్‌ అగ్ర ద‌ర్శ‌కుల జాబితాలో చోటు ద‌క్కించుకున్నాడు. అట్లీ నుంచి సినిమా వ‌చ్చి మూడేళ్ళ‌యింది. ఈ క్ర‌మంలో బాలీవుడ్ బాద్‌షా షారుఖ్ ఖాన్‌తో జ‌వాన్‌ తెర‌కెక్కిస్తున్న‌ట్లు ప్ర‌క‌టించ‌డంతో ప్రేక్ష‌కుల‌లో భారీ అంచ‌నాలు ఏర్ప‌డ్డాయి. ఇటీవ‌లే విడుద‌లైన టైటిల్ టీజ‌ర్‌కు ప్రేక్ష‌కుల నుండి విశేష స్పంద‌న వ‌చ్చింది. ఇదిలా ఉంటే తాజాగా ఈ చిత్రంలో మ‌రో స్టార్ హీరో క‌నిపించ‌బోతున్నాడు.

ప్ర‌స్తుతం షూటింగ్ ద‌శ‌లో ఉన్న ఈ చిత్రంలో గెస్ట్ రోల్ కోసం అట్లీ స్టార్ హీరోను రంగంలో దింపుతున్నాడు. తమిళ స్టార్ హీరో విజ‌య్ ఈ చిత్రంలో గెస్ట్ రోల్‌లో న‌టిస్తున్నాడు. ఈయ‌న పాత్ర 5 నిమిషాలు ఉండ‌నుంద‌ని టాక్. అంతేకాకుండా క‌థ‌ను మ‌లుపు తిప్పే పాత్ర విజ‌య్‌ద‌ని కోలీవుడ్ వ‌ర్గాల స‌మాచారం. ఈ చిత్రంలో షారుఖ్ తండ్రి, కొడుకుగా డ్యూయ‌ల్ రోల్‌లో న‌టించ‌నున్నాడు. న‌య‌న‌తార ఇన్వెస్టిగేటీవ్ ఆఫీస‌ర్‌గా న‌టించ‌నుంది. బాలీవుడ్ భామ సాన్య మ‌ల్హోత్రా ఈ చిత్రంలో కీల‌క‌పాత్ర‌లో న‌టించ‌నుంది. అనిరుధ్ ర‌విచంద్ర‌న్ సంగీతం అందిస్తున్నాడు. ఈ చిత్రాన్ని రెడ్ చిల్లీస్ బ్యాన‌ర్‌పై షారుఖ్ స్వీయ నిర్మాణంలో తెర‌కెక్కిస్తున్నాడు. ఈ చిత్రం వ‌చ్చే ఏడాది జూన్ 2న విడుద‌ల కానుంది.