Goat | `ప్రీ రిలీజ్ ఈవెంట్‌లో సుడిగాలి సుధీర్‌కు దివ్యభారతి షాక్.. హీరో పేరు ప్రస్తావించకుండానే స్పీచ్!

Goat | బుల్లితెరపై తనదైన కామెడీ టైమింగ్‌తో స్టార్‌గా ఎదిగిన సుడిగాలి సుధీర్.. ఇప్పుడు వెండితెరపై హీరోగా తన అదృష్టాన్ని పరీక్షించుకుంటున్నారు. ఆయన హీరోగా నటించిన తాజా చిత్రం ‘గోట్’ (GOAT – Greater of All Time) నవంబర్ 12న ప్రేక్షకుల ముందుకు రానుంది.

Goat | బుల్లితెరపై తనదైన కామెడీ టైమింగ్‌తో స్టార్‌గా ఎదిగిన సుడిగాలి సుధీర్.. ఇప్పుడు వెండితెరపై హీరోగా తన అదృష్టాన్ని పరీక్షించుకుంటున్నారు. ఆయన హీరోగా నటించిన తాజా చిత్రం ‘గోట్’ (GOAT – Greater of All Time) నవంబర్ 12న ప్రేక్షకుల ముందుకు రానుంది. కోలీవుడ్ బ్యూటీ దివ్యభారతి ఈ సినిమాతో తెలుగు ప్రేక్షకులకు పరిచయం కాబోతున్నారు. ఇప్పటికే తమిళ చిత్రం ‘బ్యాచిలర్’తో మంచి గుర్తింపు తెచ్చుకున్న ఆమె టాలీవుడ్ ఎంట్రీపై కూడా ఆసక్తి నెలకొంది. అయితే సినిమా విడుదలకు సిద్ధమవుతున్న తరుణంలో చిత్ర యూనిట్ మధ్య చోటుచేసుకున్న వివాదాలు ఇప్పుడు హాట్ టాపిక్‌గా మారాయి. తాజాగా జరిగిన ప్రీ రిలీజ్ వేడుకలో దివ్యభారతి చేసిన వ్యాఖ్యలు, ఆమె స్పీచ్‌లో సుధీర్ పేరు ప్రస్తావించకపోవడం చర్చనీయాంశంగా మారింది.

నిజానికి ‘గోట్’ సినిమా ఎప్పుడో విడుదల కావాల్సి ఉంది. అయితే దర్శకుడి మార్పు, బడ్జెట్ సమస్యలు తదితర కారణాలతో ఈ ప్రాజెక్ట్ ఆలస్యమైంది. ఇలాంటి పరిస్థితుల్లో నిర్మాత చంద్రశేఖర్ రెడ్డి బాధ్యత తీసుకుని సినిమాను పూర్తి చేసినట్లు చిత్రబృందం వెల్లడించింది. వేదవ్యాస్ ఈ చిత్రానికి దర్శకత్వం వహించారు. సినిమా ఆలస్యమైనప్పటికీ ఎట్టకేలకు విడుదలకు సిద్ధం కావడంతో చిత్ర యూనిట్ ప్రమోషన్స్‌ను వేగవంతం చేసింది. ఈ సినిమా చుట్టూ గతంలోనే కొన్ని వివాదాలు తెరపైకి వచ్చాయి. ముఖ్యంగా దర్శకుడి నుంచి తనకు ఇబ్బందులు ఎదురయ్యాయని దివ్యభారతి ఆరోపించినట్లు వార్తలు వచ్చాయి. ఆ సమయంలో హీరో సుడిగాలి సుధీర్ స్పందించలేదని ఆమె అసంతృప్తి వ్యక్తం చేసినట్లు ప్రచారం జరిగింది. అలాంటి పరిస్థితుల్లో సుధీర్‌తో కలిసి పనిచేయడం బాధాకరంగా ఉందనే అభిప్రాయాన్ని కూడా ఆమె వెల్లడించినట్లు కథనాలు వచ్చాయి. అయితే ఈ ఆరోపణలపై సుధీర్ ఇప్పటివరకు బహిరంగంగా స్పందించలేదు.

ఇదిలా ఉంటే, వ్యక్తిగత విభేదాల కారణంగా సినిమా ప్రమోషన్స్‌కు ఇబ్బంది కలగకూడదనే ఉద్దేశంతో ఇద్దరూ కలిసి కార్యక్రమాల్లో పాల్గొంటున్నట్లు కనిపిస్తోంది. కానీ తాజాగా జరిగిన ప్రీ రిలీజ్ ఈవెంట్‌లో దివ్యభారతి చేసిన ప్రసంగం మరోసారి వివాదానికి కారణమైంది. ప్రీ రిలీజ్ వేడుకలో మాట్లాడిన దివ్యభారతి భావోద్వేగానికి గురయ్యారు. గత రెండేళ్లుగా ఈ సినిమా కోసం ఎంతో ఎదురుచూశానని, ఎన్నో కష్టాలను దాటుకుని ఇప్పుడు చిత్రం ప్రేక్షకుల ముందుకు వస్తోందని చెబుతూ కన్నీళ్లు పెట్టుకున్నారు. సినిమా మధ్యలో కొందరు వెనకడుగు వేయాలని చూసినా నిర్మాత చంద్రశేఖర్ రెడ్డి మాత్రం పట్టుదలతో ప్రాజెక్ట్‌ను పూర్తి చేశారని ప్రశంసించారు. అంతేకాకుండా ‘గోట్’ కేవలం ఫన్ ఎంటర్‌టైనర్ మాత్రమే కాదని, గ్రామీణ ప్రాంతాల్లో కనిపించే బెట్టింగ్, జూదం వంటి అంశాలపై బలమైన సామాజిక సందేశం కూడా ఇందులో ఉంటుందని తెలిపారు. ఈ క్రమంలో సినిమా కోసం కష్టపడిన పలువురి గురించి ప్రస్తావించిన ఆమె.. హీరో సుడిగాలి సుధీర్ పేరు మాత్రం చెప్పకుండానే తన ప్రసంగాన్ని ముగించారు. ప్రసంగంలో పేరు ప్రస్తావించకపోవడాన్ని ఉద్దేశపూర్వక అవమానంగా భావించడం సరైంది కాదని, దాని వెనుక అసలు కారణం ఏమిటో తెలియాల్సి ఉందని మరికొందరు అభిప్రాయపడుతున్నారు.