కష్టాన్ని మరిపించిన విజయమిది

‘సినిమా బాగుందని ప్రతి ఒక్కరూ చెబుతున్నారు. మేము పడిన కష్టాన్ని మరిపించిన విజయమిది’ అని అన్నారు వెంకటేష్‌ త్రిపర్ణ. ఆయన దర్శకత్వం వహిస్తూ అభినవ్‌సర్దార్‌తో కలిసి నిర్మించిన చిత్రం ‘రామ్‌అసుర్‌’. అభినవ్‌సర్దార్‌, రామ్‌కార్తిక్‌, చాందిని, షెర్రీ అగర్వాల్‌ నాయకానాయికలుగా నటించారు. ఇటీవల ఈ చిత్రం ప్రేక్షకుల ముందుకొచ్చింది. ఈ సందర్భంగా ఏర్పాటుచేసిన విజయోత్సవ వేడుకలో అభినవ్‌సర్దార్‌ మాట్లాడుతూ ‘ప్రేక్షకులతో కలిసి ప్రత్యక్షంగా కొన్ని నగరాల్లో సినిమా చూశాం. కథ, పాత్రలను వారు ఆదరిస్తున్న తీరు చూస్తుంటే ఆనందంగా ఉంది. విమర్శకులు సైతం సినిమా బాగుందని చెబుతున్నారు. కొత్తదనాన్ని నమ్మి మేము చేసిన ప్రయత్నం ఫలించింది’ అన్నారు. వసూళ్లు బాగున్నాయని, నాయకానాయికల నటనకు చక్కటి స్పందన లభిస్తున్నదని దర్శకుడు పేర్కొన్నారు. ఈ సినిమాలో తాను గ్లామర్‌, అభినయం కలబోసిన మంచి పాత్రను చేశానని షెర్రీ అగర్వాల్‌ చెప్పింది. ఈ కార్యక్రమంలో షానీ సాల్మన్‌, ఆర్కే తదితరులు పాల్గొన్నారు.