Sneha Jain: ఒక రోజు గ‌డ‌పాలంటూ స్నేహాకు ఫోన్ చేసిన సౌత్ ద‌ర్శ‌కుడు

ప్రతి ఇండస్ట్రీలో అందరిని వేధిస్తున్న సమస్య ఏదైనా ఉంది అంటే అది ‘క్యాస్టింగ్ కౌచ్’. అవకాశాలు దక్కాలి అంటే నటీమ‌ణులు ఈ క్యాస్టింగ్ కౌచ్‌ని దాటాల్సిందనే వాదన చాలా కాలంగా వినిపిస్తుంది. తాజాగా త‌న జీవితంలో ఎద‌రైన అనుభ‌వాల‌ని ఓ ఆంగ్ల ప‌త్రిక‌తో పంచుకుంది న‌టి స్నేహా జైన్.

ప్రస్తుతం ‘సాత్ నిభానా సాథియా-2’ ధారావాహికలో నటిస్తున్న ఆమె కెరీర్‌ ఆరంభంలో తాను కూడా క్యాస్టింగ్‌ కౌచ్‌ ఎదుర్కొన్నానని అన్నారు. ‘నేను పరిశ్రమలోకి వచ్చిన మొదట్లో దక్షిణాదికి చెందిన ఓ దర్శకుడి నుంచి నాకు ఒక ఆఫర్‌ వచ్చింది. కాలేజ్‌ స్టూడెంట్స్ నేపథ్యంలో తెరకెక్కిస్తున్న సినిమాలో నాకు అవకాశం ఇస్తున్నట్లు చెప్పాడు. అందరివీ ప్రాధాన్యం ఉన్న పాత్రలేనని ఆయన అన్నాడు. దాంతో నా వివరాలు, ఫొటోలను ఆయనకు పంపించాను.

త‌ర్వాతి రోజు ఫోన్ చేసి హైద‌రాబాద్‌కి ర‌మ్మ‌ని చెప్పిన ఆయ‌న ఒకరోజంతా తనతోనే గడపాలని.. దేనికైనా ఓకే చెప్పాలన్నాడు. ఆ మాటకు నేను షాక్‌ అయ్యాను. నేను అలాంటివి చేయనని చెప్పేశాను. వారం త‌ర్వాత మ‌ళ్లీ కాల్ చేసి ఇలాంటి స‌ర్వ సాధార‌ణం. నువ్వు ఓకే అంటే ఇంకా ఆఫ‌ర్ ఉంద‌ని అన్నాడు. దానికి నాకు కోపం వ‌చ్చి గ‌ట్టిగా అరచి ఫోన్ పెట్టేశాను అని చెప్పుకొచ్చింది ముంబై న‌టి స్నేహా జైన్.