Sharada | లెజెండరీ నటి శారదకు అరుదైన గౌర‌వం.. జేసీ డేనియల్ అవార్డుకి ఎంపికైన‌ట్టు ప్ర‌క‌ట‌న‌

Sharada | భారతీయ సినీ చరిత్రలో తన సహజ నటనతో ప్రత్యేక స్థానం సంపాదించుకున్న ప్రముఖ నటి శారదకు అరుదైన గౌరవం దక్కింది. మలయాళ చిత్ర పరిశ్రమకు ఆమె చేసిన అమూల్యమైన సేవలను గుర్తించిన కేరళ ప్రభుత్వం, రాష్ట్రంలోని అత్యున్నత సినీ పురస్కారమైన జేసీ డేనియల్ అవార్డు (JC Daniel Award)–2024కు శారదను ఎంపిక చేసినట్లు అధికారికంగా ప్రకటించింది.

Sharada | భారతీయ సినీ చరిత్రలో తన సహజ నటనతో ప్రత్యేక స్థానం సంపాదించుకున్న ప్రముఖ నటి శారదకు అరుదైన గౌరవం దక్కింది. మలయాళ చిత్ర పరిశ్రమకు ఆమె చేసిన అమూల్యమైన సేవలను గుర్తించిన కేరళ ప్రభుత్వం, రాష్ట్రంలోని అత్యున్నత సినీ పురస్కారమైన జేసీ డేనియల్ అవార్డు (JC Daniel Award)–2024కు శారదను ఎంపిక చేసినట్లు అధికారికంగా ప్రకటించింది. ఈ విషయాన్ని కేరళ సాంస్కృతిక వ్యవహారాల శాఖ వెల్లడించింది. జేసీ డేనియల్ అవార్డు అనేది కేరళలో సినిమారంగంలో జీవితకాల సేవలకు అందించే అత్యంత ప్రతిష్ఠాత్మక పురస్కారం. ఈ అవార్డు కింద శారదకు రూ.5 లక్షల నగదు బహుమతి, ప్రశంసా పత్రం, జ్ఞాపిక అందజేయనున్నారు.

జనవరి 25న తిరువనంతపురంలో నిర్వహించనున్న కేరళ రాష్ట్ర చలనచిత్ర అవార్డుల ప్రదానోత్సవంలో ముఖ్యమంత్రి పినరయి విజయన్ చేతుల మీదుగా శారద ఈ గౌరవాన్ని స్వీకరించనున్నారు. ఈ పురస్కారానికి ఎంపిక చేసే కమిటీలో ప్రముఖ నటి ఊర్వశి, ప్రముఖ నిర్మాత బాలు కిరియత్ సభ్యులుగా ఉన్నారు. కేరళ రాష్ట్ర చలనచిత్ర అకాడమీ కార్యదర్శి సి. అజోయ్ ఈ కమిటీకి కన్వీనర్‌గా వ్యవహరించారు. కమిటీ ఏకగ్రీవంగా శారద పేరును సిఫారసు చేయడం ఆమె సినీ ప్రస్థానానికి లభించిన గౌరవంగా సినీ వర్గాలు అభిప్రాయపడుతున్నాయి. శారద 1945 జూన్ 25న ఆంధ్రప్రదేశ్‌లోని తెనాలి పట్టణంలో జన్మించారు. ఆమె తండ్రి వెంకటేశ్వరరావు, తల్లి సత్యవాణి దేవి. శారద అసలు పేరు సరస్వతీ దేవి.

చిన్ననాటి నుంచే నటనపై ఆసక్తి పెంచుకున్న ఆమె, తెలుగు చిత్రం ‘ఇద్దరు మిత్రులు’ ద్వారా సినీ రంగంలో అడుగుపెట్టారు. అనంతరం తన పేరు సరస్వతీ దేవి నుంచి శారదగా మార్చుకుని సినీ ప్రయాణాన్ని కొనసాగించారు. 1965లో విడుదలైన ‘ఇణప్రావుకళ్’ సినిమాతో మలయాళ చిత్ర పరిశ్రమలోకి అడుగుపెట్టిన శారద, అతి తక్కువ కాలంలోనే అక్కడి ప్రేక్షకుల మనసు గెలుచుకున్నారు. ముఖ్యంగా 1968లో విడుదలైన ‘తులాభారం’ సినిమా ఆమె కెరీర్‌ను మలుపు తిప్పింది. ఈ చిత్రంలో ఆమె ప్రదర్శించిన హృదయవిదారక నటనకు గాను జాతీయ ఉత్తమ నటి అవార్డు అందుకున్నారు. ఆ తర్వాత 1972లో ప్రముఖ దర్శకుడు అదూర్ గోపాలకృష్ణన్ తెరకెక్కించిన ‘స్వయంవరం’ సినిమాకు గానూ రెండోసారి జాతీయ ఉత్తమ నటి అవార్డు దక్కింది. అంతేకాదు, 1977లో విడుదలైన తెలుగు చిత్రం ‘నిమజ్జనం’ ద్వారా మూడోసారి జాతీయ ఉత్తమ నటి అవార్డు సాధించి, మూడు సార్లు ఈ గౌరవం పొందిన తొలి నటిగా చరిత్ర సృష్టించారు. తెలుగు, మలయాళ, తమిళం, కన్నడ భాషల్లో వందలాది సినిమాల్లో నటించి ప్రేక్ష‌కుల‌ని అలరించింది.