Sarvam Maya OTT | రూ.145 కోట్ల సినిమా.. ఓటీటీలోకి మ‌ల‌యాళ బ్లాక్ బ‌స్ట‌ర్ ‘సర్వంమాయా’

Sarvam Maya OTT | మలయాళ స్టార్ హీరో నివిన్ పౌలీ కెరీర్‌లో బిగ్గెస్ట్ గ్రాసర్‌గా నిలిచిన ఫాంటసీ హారర్ కామెడీ చిత్రం 'సర్వంమాయా' ఇప్పుడు డిజిటల్ సందడికి సిద్ధమైంది.

మలయాళ స్టార్ హీరో నివిన్ పౌలీ కెరీర్‌లో బిగ్గెస్ట్ గ్రాసర్‌గా నిలిచిన ఫాంటసీ హారర్ కామెడీ చిత్రం ‘సర్వంమాయా’ ఇప్పుడు డిజిటల్ సందడికి సిద్ధమైంది. అఖిల్ సత్యన్ దర్శకత్వంలో గతేడాది డిసెంబర్ 25న క్రిస్మస్ కానుకగా విడుదలైన ఈ చిత్రం బాక్సాఫీస్ వద్ద కాసుల వర్షం కురిపించింది. కేవలం 10 రోజుల్లోనే రూ. 100 కోట్ల క్లబ్‌లో చేరిన ఈ మూవీ, ఇప్పటివరకు ప్రపంచవ్యాప్తంగా రూ. 145 కోట్లకు పైగా వసూళ్లను సాధించి మలయాళ చిత్ర పరిశ్రమలో సరికొత్త రికార్డులను సృష్టించింది. ఒక నాస్తికుడైన బ్రాహ్మణ యువకుడికి, ఒక ‘జెన్-జెడ్’ దయ్యానికి మధ్య సాగే ఆసక్తికర ప్రయాణంతో రూపుదిద్దుకున్న ఈ సినిమా ప్రేక్షకులను ఆద్యంతం అలరిస్తోంది.

థియేటర్లలో భారీ విజయాన్ని అందుకున్న ఈ సినిమా డిజిటల్ హక్కులను ప్రముఖ ఓటీటీ ప్లాట్‌ఫాం ‘జియో హాట్‌స్టార్’ కైవసం చేసుకుంది. జనవరి 30 నుంచి ఈ చిత్రం స్ట్రీమింగ్ కాబోతున్న‌ట్లు చిత్ర‌బృందం ప్ర‌క‌టించింది. మ‌ల‌యాళంతో పాటు తెలుగు, తమిళం, హిందీ, క‌న్న‌డ భాష‌ల్లో ఈ చిత్రం అందుబాటులోకి రాబోతుంది. ‘ప్రేమమ్’ వంటి భారీ హిట్ తర్వాత సరైన సక్సెస్ కోసం ఎదురుచూస్తున్న నివిన్ పౌలీకి ఈ సినిమా గట్టి కంబ్యాక్ ఇచ్చిందని విమర్శకులు ప్రశంసిస్తున్నారు. ఇందులో రియా షిబు, అజు వర్గీస్ కీలక పాత్రలు పోషించగా, జస్టిన్ ప్రభాకరన్ అందించిన సంగీతం సినిమాకు ప్రధాన ఆకర్షణగా నిలిచింది.