ఇక జ‌రిగింది చాలు.. వైర‌ల్‌గా మారిన స‌మంత‌ ఇన్‌స్టాగ్రామ్ పోస్టు

November 10, 2021 / 03:10 AM IST

Samantha | నాగచైతన్యతో విడాకుల అనంతరం సమంత సోషల్‌మీడియాలో పెట్టే పోస్టులు తాత్విక ధోరణిలో సాగుతున్నాయి. కష్టాలను అధిగమించి జీవితంలో కొత్త ప్రయాణాన్ని సాగించాలని, ఆశావాహ దృక్పథంతో ముందుకు సాగాలనే స్ఫూర్తితో సమంత పోస్టులు కనిపిస్తున్నాయి. తాజాగా మంగళవారం తన ఇన్‌స్టాగ్రామ్‌ ఖాతాలో అమెరికా రచయిత జామీ వారున్‌ కోట్‌ను ఆమె పోస్ట్‌ చేసింది.

‘మహాసామ్రాజ్యాల్ని నిర్మించుకొని అందరికంటే అధికులుగా ఉండాలనే ఆలోచనతో కాకుండా ఆనందకరమైన జీవితాన్ని కోరుకుంటే ఎలా ఉంటుంది? గాయాల నుంచి ఉపశమనం పొందే మార్గాన్ని అన్వేషించి హాయిని పొందితే ఎలా ఉంటుంది? విజయానికి కొత్త నిర్వచనం తెలుసుకుంటే ఏమనిపిస్తుంది? నీ విలువలకు తగినట్లుగా జీవితాన్ని పొందటం గురించి ఆలోచించడం ఎలా అనిపిస్తుంది? ఫిల్టర్‌లను తీసివేసి నీదైన దృష్టికోణంలో జీవితాన్ని తరచిచూసి అందులోని శక్తిని ఆస్వాదిస్తే ఎలా ఉంటుంది? అత్యాశకు పోకుండా నీకున్న సమయంలో సంతృప్తికరమైన జీవితాన్ని గడిపితే ఏమనిపిస్తుంది? ఇక జరిగింది చాలనుకొని సర్దుకుపోతే ఎలా ఉంటుంది? ఇలాంటి అనుభవాలన్నీ ఎంత గొప్పగా ఉంటాయి కదా ’ అంటూ సమంత పోస్ట్‌ చేసింది. ఆమె పెట్టిన ఈ పోస్ట్‌ ఎవరిని ఉద్దేశించి అయ్యుంటుందోనని ఇండస్ట్రీ వర్గాలు చర్చించుకుంటున్నాయి.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి