Lin Laishram | 2023లో చాలామంది సెలబ్రిటీలు, తమ బ్యాచ్లర్ లైఫ్కు చెక్ పెట్టారు. నచ్చిన అమ్మాయి, అబ్బాయితో ఏడడుగులు నడిచి వివాహ బంధానికి వెల్కమ్ చెప్పారు. అయితే తాజాగా మరో స్టార్ జంట పెళ్లి చేసుకోబోతుంది. ప్రముఖ బాలీవుడ్ నటుడు రణ్దీప్ హుడా త్వరలోనే పెళ్లి పీటలు ఎక్కనున్నాడు. 47 ఏళ్ల వయసులో తన ప్రియురాలు బాలీవుడ్ మోడల్ లిన్ లైస్రామ్ (37)ను మరికొద్ది రోజుల్లో పెళ్లి చేసుకోబోతున్నారు. ఈ విషయాన్ని సోషల్ మీడియాలో తెలుపుతూ.. ఒక స్పెషల్ పోస్ట్ పెట్టాడు.
మహాభారతంలో మణిపుర్ యువరాణి చిత్రాంగదను అర్జునుడు ఎక్కడ వివాహం చేసుకున్నాడో.. అక్కడే మేము ఒక్కటి కాబోతున్నాం. ఈ నెల 29న ఇంఫాల్లో కుటుంబసభ్యులు, సన్నిహితులు సమక్షంలో మా (రణ్దీప్ హుడా, లిన్ లైస్రామ్) పెళ్లి జరగనుంది. త్వరలోనే ముంబయిలో రిసెప్షన్ ఏర్పాటు చేయనున్నాం. మా ప్రయాణానికి మీ ఆశీస్సులు ఉండాలని కోరుకుంటున్నాం అని రణ్దీప్ హుడా ఇన్స్టాలో రాసుకోచ్చాడు. కాగా ప్రస్తుతం ఈ పోస్ట్ వైరల్గా మారింది.
2001లో రిలీజైన మన్సూన్ వెడ్డింగ్ సినిమాతో బాలీవుడ్లో ఎంట్రీ ఇచ్చారు రణ్దీప్ హుడా. ఇక ఆయన నటించిన చిత్రాలలో ‘జిస్మ్ 2’, ‘బాంబే టాకీస్’, ‘కిక్’, ‘హైవే’ సినిమాలు మంచి పేరు తెచ్చిపెట్టాయి. ఇక ప్రస్తుతం బీజేపీ ప్రాపగాండా మూవీ ‘స్వతంత్ర వీర్ సావర్కర్’ చిత్రంలో నటిస్తున్నాడు.