Visit:
Pulavar | తమిళ సినీ పరిశ్రమలో తనదైన ముద్ర వేసిన దిగ్గజ దర్శకుడు, నటుడు భారతీరాజా చివరిసారిగా నటించిన చిత్రానికి ఎట్టకేలకు టైటిల్ ఖరారైంది. ‘పులవర్’ అనే పేరుతో ఈ సినిమాను ప్రేక్షకుల ముందుకు తీసుకురాబోతున్నారు. తాజాగా చిత్రబృందం ఈ మూవీ టీజర్ను విడుదల చేయడంతో భారతీరాజా అభిమానుల్లో ఆసక్తి నెలకొంది. సుమారు ఒక నిమిషం 8 సెకన్ల నిడివి ఉన్న ఈ టీజర్లో భారతీరాజా చాలా భిన్నమైన పాత్రలో కనిపించారు. పోలీస్ స్టేషన్లోని ఓ గదిలో బనియన్ ధరించి ఉన్న ఆయన.. ఓ హత్య కేసుకు సంబంధించి నలుగురిని విచారిస్తున్నట్లు టీజర్లో చూపించారు.
ఆయన మాటల్లో గంభీరత, విచారణ చేసే తీరు సినిమాపై ఆసక్తిని పెంచేలా ఉన్నాయి. అయితే ఈ పాత్రలో మరో ఆసక్తికరమైన కోణం కూడా కనిపిస్తుంది. హత్య కేసు విచారణ సాగుతున్న సమయంలోనే భారతీరాజా క్యారమ్, టేబుల్ టెన్నిస్ ఆడుతూ కనిపించడం టీజర్లో ప్రత్యేకంగా నిలిచింది. టీజర్లో కథకు సంబంధించిన వివరాలను పూర్తిగా వెల్లడించకపోయినా.. భారతీరాజా పాత్ర చుట్టూ కథ తిరుగుతుందనే ఆసక్తిని మాత్రం కలిగిస్తోంది. ముఖ్యంగా ఆయన చివరిగా నటించిన సినిమా కావడంతో అభిమానుల్లో ఈ చిత్రంపై సహజంగానే అంచనాలు పెరుగుతున్నాయి. భారతీరాజా కేవలం దర్శకుడిగానే కాకుండా నటుడిగానూ ప్రేక్షకులకు దగ్గరయ్యారు. గ్రామీణ నేపథ్య కథలు, సహజమైన పాత్రలు, బలమైన భావోద్వేగాలను తెరపై ఆవిష్కరించిన ఆయన తమిళ సినిమాకు ప్రత్యేకమైన గుర్తింపును తీసుకొచ్చారు.
తన దర్శకత్వంతో ఎన్నో తరాల ప్రేక్షకులను ప్రభావితం చేసిన భారతీరాజా.. అనంతరం నటుడిగానూ పలు చిత్రాల్లో కీలక పాత్రలు పోషించారు. ‘పులవర్’ ఆయన నటించిన చివరి చిత్రంగా నిలవడంతో ఈ సినిమాకు ప్రత్యేక ప్రాధాన్యత ఏర్పడింది. ఈ చిత్రానికి మురుగయ్య కథను అందించడంతో పాటు దర్శకత్వం వహించారు. భారతీరాజాతో పాటు రాచెల్ రెబాకా, హలో కందస్వామి, రవిచంద్రన్, వెట్రివేల్ రాజా, భూపాలం సెంథిల్ తదితరులు ఇందులో నటించారు. సూపర్ టాకీస్, వైట్సైట్స్ ఎంటర్టైన్మెంట్స్ సంయుక్తంగా ఈ చిత్రాన్ని నిర్మించాయి. టీజర్లో కనిపించిన అంశాలను బట్టి చూస్తే హత్య కేసు, విచారణ, అనుమానితుల చుట్టూ కథనం సాగుతున్నట్లు తెలుస్తోంది. అయితే అసలు కథ, భారతీరాజా పాత్ర ఏంటి అనే విషయాలను చిత్రబృందం పూర్తిగా గోప్యంగా ఉంచింది.కాగా, భారతీరాజా జూన్ 10న కన్నుమూసిన విషయం తెలిసిందే. ఆయన మరణంతో తమిళ చిత్ర పరిశ్రమలో తీవ్ర విషాదం నెలకొంది. ఇప్పుడు ఆయన చివరిసారిగా నటించిన ‘పులవర్’ చిత్రం సెప్టెంబర్ 25న ప్రేక్షకుల ముందుకు రానుంది.దీంతో భారతీరాజాను చివరిసారిగా వెండితెరపై చూసే అవకాశం కోసం అభిమానులు ఆసక్తిగా ఎదురుచూస్తున్నారు.
