Visit:
Pragathi | టాలీవుడ్ నటి ప్రగతి తన సుదీర్ఘ సినీ ప్రయాణంలో ఎదురైన అనుభవాలు, వ్యక్తిగత అభిరుచులు, భవిష్యత్ లక్ష్యాల గురించి ఓ ఇంటర్వ్యూలో క్లారిటీ ఇచ్చారు. సినిమా రంగంలో పాత్రకు, డబ్బుకు మధ్య తన ప్రాధాన్యతను వివరించిన ఆమె, మంచి పాత్ర లభిస్తే పారితోషికం విషయంలో రాజీ పడేందుకు సిద్ధమని తెలిపారు. అయితే, కథ లేదా పాత్ర నచ్చకపోతే ఎంత పెద్ద అవకాశం అయినా వదులుకుంటానని ఆమె తేల్చి చెప్పారు. తక్కువ పారితోషికానికి పనిచేయడాన్ని నిరాకరించిన సందర్భాలు కూడా ఉన్నాయని చెప్పిన ప్రగతి, ఒక దర్శకుడితో పనిచేసినప్పుడు ఎదురైన చేదు అనుభవాన్ని గుర్తుచేసుకున్నారు. ఆ దర్శకుడి పేరు గుర్తులేకపోయినా, షూటింగ్ ప్రారంభమైన రెండో రోజుకే ఆయనతో మళ్లీ పనిచేయకూడదని నిర్ణయించుకున్నానని వెల్లడించారు. తన కెరీర్లో అలాంటి అనుభవం ఒక్కసారి మాత్రమే ఎదురైందని తెలిపారు.
చిన్న, పెద్ద సినిమాల మధ్య తేడా గురించి మాట్లాడిన ప్రగతి, నటన అనేది అన్ని సినిమాల్లో ఒకేలా ఉంటుందని అభిప్రాయపడ్డారు. బడ్జెట్ ఆధారంగానే చిన్న, పెద్ద సినిమాలుగా విభజన ఉంటుందని, దర్శకుడు లేదా హీరో స్థాయితో సంబంధం లేదని స్పష్టం చేశారు. తన కెరీర్లో 99 శాతం సినిమాలు విడుదలయ్యాయని, పెద్ద నిర్మాణ సంస్థలతో పాటు చిన్న సినిమాల్లోనూ నటించినా, అవన్నీ ప్రేక్షకుల ముందుకు వచ్చినవేనని చెప్పారు. సినిమాలతో పాటు పవర్ లిఫ్టింగ్పై తనకున్న ఆసక్తిని కూడా ప్రగతి వెల్లడించారు.
ఇప్పటికే ఆసియా స్థాయిలో విజయాలు సాధించిన ఆమె, కామన్వెల్త్ క్రీడల్లో పాల్గొనడం తన లక్ష్యమని తెలిపారు. షూటింగ్ల మధ్యలో కూడా రోజుకు రెండు నుంచి మూడు గంటలు వర్కవుట్ చేస్తానని, ఫిట్నెస్ తనకు ఎంతో ఆనందాన్ని ఇస్తుందని చెప్పారు. 80–90 ఏళ్ల వయసులో కూడా చురుకుగా ఉండాలని ఆశిస్తున్నానని, పవర్ లిఫ్టింగ్ వల్ల తన ఫెమినిటీకి ఎలాంటి భంగం కలగలేదని ప్రగతి స్పష్టం చేశారు. తాను ఎప్పటికీ ఒక మహిళగానే ఉంటానని ధైర్యంగా చెప్పారు.
