Prabhas ఫ్యాన్స్‌కు గుడ్‌న్యూస్‌.. మూడు నెల‌ల గ్యాప్‌లో రెండు సినిమాలు

ప్ర‌భాస్ ఫ్యాన్స్‌కు గుడ్‌న్యూస్‌ | జ‌న‌వ‌రి 14న రాధేశ్యామ్ విడుద‌ల అవుతుంటే.. ఏప్రిల్ 14న ప్ర‌శాంత్ నీల్ తెర‌కెక్కిస్తున్న స‌లార్ రిలీజ్ కానుంది.

July 31, 2021 / 07:03 PM IST

Prabhas ఫ్యాన్స్‌కు గుడ్‌న్యూస్‌.. మూడు నెల‌ల గ్యాప్‌లో రెండు సినిమాలు

Radhe shyam | ఇంతకంటే ప్రభాస్ అభిమానులకు కావాల్సింది ఏం లేదు. ఎందుకంటే మూడేళ్లుగా ఆయన నుంచి సినిమాలు రావడం లేదని అభిమానులు తెగ ఫీల‌వుతున్నారు. అలాంటి వాళ్ల‌కు మూడు నెలల్లో రెండు సినిమాలతో దర్శనం ఇవ్వడానికి సిద్ధమవుతున్నాడు ప్రభాస్. ప్ర‌స్తుతం ఆయ‌న న‌టిస్తున్న సినిమాలు త్వ‌ర‌గా షూటింగ్ పూర్తి చేసుకుంటున్నాయి. ఇప్ప‌టికే రాధే శ్యామ్ సినిమాను సంక్రాంతి కానుక‌గా వ‌చ్చే ఏడాది జ‌న‌వ‌రి 14న విడుద‌ల చేయాల‌ని ద‌ర్శ‌క నిర్మాత‌లు ఫిక్స్ అయ్యారు. దీనికి సంబంధించిన అఫిషియ‌ల్ పోస్ట‌ర్ కూడా విడుద‌లైంది. చాలా సంవ‌త్స‌రాల త‌ర్వాత సంక్రాంతి బ‌రిలో నిలుస్తున్నాడు ప్ర‌భాస్‌. ఈయ‌న‌కు సంక్రాంతి పండుగ బాగానే క‌లిసొచ్చింది. ప్ర‌భాస్ కెరీర్‌లో ఫ‌స్ట్ బిగ్గెస్ట్ హిట్ వ‌ర్షం సినిమా 2004 సంక్రాంతికి విడుద‌లైంది. ఆ త‌ర్వాత యోగి కూడా అదే పండ‌క్కి వ‌చ్చినా అంచ‌నాలు అందుకోలేక‌పోయింది.

ఇప్పుడు రాధాకృష్ణ కుమార్ తెర‌కెక్కిస్తున్న రాధేశ్యామ్ సినిమాపై అంచ‌నాలు భారీగానే ఉన్నాయి. ప్యూర్ ల‌వ్ స్టోరీలా తెర‌కెక్కుతున్న ఈ సినిమా తెలుగుతో పాటు హిందీ, త‌మిళం, మ‌ల‌యాళ భాష‌ల్లో ఒకేరోజు విడుద‌ల కానుంది. దాదాపు రూ.140 కోట్ల బ‌డ్జెట్‌తో గోపీకృష్ణ మూవీస్, యూవీ క్రియేష‌న్స్ సంయుక్తంగా నిర్మిస్తున్నాయి. ఇదిలా ఉంటే ఈ సినిమా వ‌చ్చిన త‌ర్వాత స‌రిగ్గా మూడు నెల‌ల్లో మ‌రో సినిమాతో ప్ర‌భాస్ రానున్నాడు. జ‌న‌వ‌రి 14న రాధేశ్యామ్ విడుద‌ల అవుతుంటే.. ఏప్రిల్ 14న ప్ర‌శాంత్ నీల్ తెర‌కెక్కిస్తున్న స‌లార్ రిలీజ్ కానుంది. అంటే స‌రిగ్గా 90 రోజుల వ్య‌వ‌ధిలో రెండో సినిమా కూడా రానుంది. అన్నీ కుదిరితే 2022లోనే మ‌రో సినిమా విడుద‌ల‌య్యే అవ‌కాశం ఉంది. అదే ఆదిపురుష్‌. ఓం రౌత్ తెర‌కెక్కిస్తున్న ఈ సినిమా షూటింగ్ కూడా వేగంగా జ‌రుగుతుంది. మొత్తానికి 2022లో ప్ర‌భాస్ నుంచి మూడు సినిమాలు విడుద‌ల‌య్యే అవ‌కాశం ఉంది.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి