ఒకటే ఆయుధం, ఒకటే ఆశయం.. ఎన్టీఆర్‌-త్రివిక్రమ్‌ డివైన్‌ మూవీ అనౌన్స్‌మెంట్‌

ఎన్టీఆర్‌ అభిమానుల సుదీర్ఘ నిరీక్షణకు తెరపడింది. గత ఏడాదిగా విస్తృతంగా ప్రచారంలో ఉన్న త్రివిక్రమ్‌-ఎన్టీఆర్‌ కాంబో మూవీపై సోమవారం అధికారిక ప్రకటన వెలువడింది.

ఎన్టీఆర్‌ అభిమానుల సుదీర్ఘ నిరీక్షణకు తెరపడింది. గత ఏడాదిగా విస్తృతంగా ప్రచారంలో ఉన్న త్రివిక్రమ్‌-ఎన్టీఆర్‌ కాంబో మూవీపై సోమవారం అధికారిక ప్రకటన వెలువడింది. భారతీయ పురాణాల్లో విజయానికి, యుద్ధానికి ప్రతీకలా భావించే ‘గాడ్‌ ఆఫ్‌ వార్‌’ కార్తికేయుడి ఇతివృత్తం ప్రధానంగా కాల్పనిక అంశాలతో ఈ సినిమా రాబోతున్నదని ప్రచారం జరిగింది. తాజాగా విడుదల చేసిన అనౌన్స్‌మెంట్‌ పోస్టర్‌లో త్రిశూలం, కార్తికేయుడి ఆయుధమైన శూలం (శక్తివేల్‌) కనిపిస్తుండటం విశేషం. భారతీయ పురాణాల స్ఫూర్తితో దైవిక అంశాలతో ఈ చిత్రాన్ని రూపొందించబోతున్నామని, లోతైన భావోద్వేగాలు, యుద్ధ ఘట్టాలతో ఈ సినిమా ప్రేక్షకులకు అపూర్వమైన అనుభూతినందిస్తుందని మేకర్స్‌ తెలిపారు.

‘ఒకటే ఆయుధం, ఒ కటే ఆశయం..ఒక దైవిక కార్యం కోసం..’ అంటూ పోస్టర్‌పై రాసున్న క్యాప్షన్‌ చిత్ర కథను ప్రతిబింబిస్తున్నది. త్రివిక్రమ్‌-ఎన్టీఆర్‌ కలయికలో వచ్చిన ‘అరవింద సమేత వీర రాఘవ’ భారీ విజయం సాధించిన విషయం తెలిసిందే. ఈ నేపథ్యంలో తాజా సినిమాపై అందరిలో ఆసక్తినెలకొంది. ఈ సినిమాకు సంబంధించిన నటీనటులు, సాంకేతిక నిపుణులు, షూటింగ్‌ ప్రారంభ వివరాలను త్వరలో తెలియజేస్తామని మేకర్స్‌ పేర్కొన్నారు. హారిక అండ్‌ హాసిని క్రియేషన్స్‌, ఎన్టీఆర్‌ ఆర్ట్స్‌ పతాకాలపై ఎస్‌.రాధాకృష్ణ (చినబాబు), నందమూరి కల్యాణ్‌రామ్‌ నిర్మించనున్న ఈ చిత్రానికి అనిరుధ్‌ రవిచందర్‌ సంగీతాన్నందించనున్నారు.