Tollywood | తినేవాడికి బోర్ కొట్టదు.. వండే వాడికి అస్సలే బోర్ కొట్టదు.. రిటైర్మెంట్ ఉండదు అంటూ చిరునవ్వుతో సినిమాలో త్రివిక్రమ్ ఓ డైలాగ్ రాశాడు కదా..? ఇప్పుడు దాన్నే ఫాలో అయిపోతున్నారు మన దర్శకులు. చాలామంది ఈ మధ్యకాలంలో వంటల చుట్టూ కథలు అల్లుకుంటున్నారు. కుకింగ్ నేపథ్యంలోనే ఎక్కువగా సినిమాలు వస్తున్నాయి. ముఖ్యంగా స్టార్ హీరోయిన్లు చాలా మంది ఈ వంటల బ్యాక్డ్రాప్ ఉన్న సినిమాలు చేస్తున్నారు.. మరీ ముఖ్యంగా ఫుడ్ బ్యాక్డ్రాప్ ఉన్న కథలకు డిమాండ్ కూడా బాగానే ఉందిప్పుడు. తాజాగా నయనతార తన 75వ సినిమా కోసం ఈ ఫుడ్ నేపథ్యంలో సాగే కథనే ఎంచుకుంది.
అన్నపూర్ణ అనే సినిమాతో వస్తుంది నయన్. నీలేష్ కృష్ణ తెరకెక్కిస్తున్న ఈ చిత్రం రేపు ( డిసెంబర్ 1న ) విడుదల కానుంది. దీనిపై తమిళంలో అంచనాలు బాగానే ఉన్నాయి. తెలుగులోనూ సినిమా విడుదలవుతుంది. అయితే ఇక్కడ యానిమల్ ఉండటంతో నయన్ సినిమా వస్తున్నట్లు చాలా మందికి ఐడియా లేదు. ఈ సినిమా టైటిల్లోనే అన్నపూర్ణ ఉంది కాబట్టి ఫుడ్ నేఫథ్యం అని అర్థమైపోతుంది. మరోవైపు ఈ మధ్యే అనుష్క నటించిన మిస్ శెట్టి మిస్టర్ పొలిశెట్టిలోనూ ఇదే నేపథ్యం ఉంటుంది. ఇందులో చెఫ్గా నటించింది జేజమ్మ. మహేశ్ బాబు తెరకెక్కించిన ఈ సినిమా సూపర్ హిట్ అయింది. అలాగే కీర్తి సురేశ్ సైతం ఆ మధ్య మిస్ ఇండియా అనే సినిమా చేసింది.
అందులోనూ వంటలే ప్రధానమైన నేపథ్యం. ఛాయ్ బ్యాక్ డ్రాప్లోనే సినిమా అంతా సాగుతుంది. ఫారెన్లో ఓ ఛాయ్ కంపెనీ ఓపెన్ చేయాలనేది హీరోయిన్ డ్రీమ్. ఇక నాగ చైతన్య సైతం వంటల మీద బాగా ఆసక్తి చూపిస్తుంటాడు. రియల్ లైఫ్లోనూ ఈయన మంచి చెఫ్. సినిమాలోనూ ఇదే కంటిన్యూ చేస్తున్నాడీయన. ఆ మధ్య ప్రేమమ్ సినిమాలో చెఫ్గానే నటించాడు చైతూ. ఒక్కటి రెండు కాదు.. ఈ మధ్య కాలంలో ఫుడ్ ఛానెల్స్కు ఎలాగైతే డిమాండ్ బాగా పెరిగిపోయిందో.. అలాగే ఫుడ్ బేస్డ్ సినిమాలకు కూడా క్రేజ్ పెరిగిపోయింది. అందుకే దర్శకులందరి చూపు అటు వైపు వెళ్తుంది.