అమ్మాయి షూటింగ్‌కి బయలుదేరింది

‘35 చిన్న కథకాదు’ సినిమాకు గాను, 2024వ సంవత్సరానికి ఉత్తమనటిగా గద్దర్‌ అవార్డు అందుకుని, తెలంగాణ ప్రభుత్వం నుంచి ఉత్తమనటిగా అవార్డు అందుకున్న తొలి కథానాయికగా క్రెడిట్‌ కొట్టేసింది మలయాళ భామ నివేద థామస్‌.

ఆ సినిమా తర్వాత రెండేండ్లపాటు నటనకు దూరంగా ఉన్న నివేదా.. మళ్లీ కెమెరా ముందుకు రానున్నది. ‘శ్రీమతి’ అనే ఫ్యామిలీ డ్రామాలో ఆమె నటించనున్నారు. విశ్వక్‌ ఖండేరావ్‌ దర్శకుడు. ప్రైమ్‌షో ఎంటర్‌టైన్‌మెంట్స్‌ నిర్మిస్తున్న ఈచిత్రం షూటింగ్‌ త్వరలో ప్రారంభం కానున్నది. ఈ కొత్త ప్రయాణం గురించి నివేదా థామస్‌ తన సోషల్‌ మీడియా వేదికగా స్పందించింది. ‘అంతా సిద్ధమైంది.. ఓ కొత్త ప్రపంచంలోకి అడుగుపెట్టేందుకు సిద్ధమవుతున్నాను.

ఇది నాకు తెలిసిన ప్రపంచమే అయినప్పటికీ ఎంతో అవసరమైనదీ.. ప్రత్యేకమైనది. కొత్త సినిమా సెట్‌లో మొదటి రోజు దగ్గర పడుతుండటంతో నాలో ఓ రకమైన ఆందోళనగా భయంగా ఉంది. ఇది ఆతృత కాదు. పని మొదలుపెట్టాలనే ఉత్సాహం. ఓ అమ్మాయి సినిమా చిత్రీకరణ కోసం బయలుదేరింది’ అని నివేదా పోస్ట్‌ చేసింది. ప్రస్తుతం ఈ పోస్ట్‌ వైరల్‌గా మారింది.