RRR | ‘నాటు నాటు’ వీడియో సాంగ్ విడుద‌ల‌

April 11, 2022 / 04:55 PM IST

RRR Naatu Naatu song | ప్ర‌స్తుతం ఆర్ఆర్ఆర్ హ‌వా ఇంకా కొన‌సాగుతూనే ఉంది. ఇప్ప‌టికీ ఈ చిత్ర క‌లెక్ష‌న్లు స్ట‌డీగానే ఉన్నాయి. గ‌తవారం విడుద‌లైన గ‌ని క‌లెక్ష‌న్ల‌కు రెట్టింపు క‌లెక్ష‌న్ల‌ను ట్రిపుల్ఆర్‌ రాబ‌డుతుంది. ద‌ర్శ‌క ధీరుడు రాజ‌మౌళి చేసిన మాయ‌కు ప్రేక్ష‌కులు థియేట‌ర్లకు రిపీటెడ్‌గా వ‌స్తున్నారు. రామ్‌చ‌ర‌ణ్‌, జూనియ‌ర్ ఎన్టీఆర్ ప్ర‌ధాన పాత్ర‌ల్లో తెర‌కెక్కిన ఈ చిత్రం మార్చి 25న విడుద‌లై బాక్సాఫీస్ ద‌గ్గ‌ర భారీ క‌లెక్ష‌న్ల‌ను రాబ‌డుతుంది. రీసెంట్‌గానే 1000కోట్ల కలెక్ష‌న్ల‌ను సాధించి రికార్డు సృష్టించింది. ఇదిలా ఉంటే తాజాగా ఈ చిత్రం నుంచి నాటు నాటు వీడియో సాంగ్‌ను మేక‌ర్స్ విడుద‌ల చేశారు.

బిగ్గ‌స్ట్ యాక్ష‌న్ డ్రామాగా తెర‌కెక్కిన ఈ చిత్ర విజ‌యంలో పాట‌లకు కూడా కొంత వ‌ర‌కు క్రెడిట్ ద‌క్కుతుంది. ఎమ్ ఎమ్ కీర‌వాణి స్వ‌ర ప‌రిచిన పాట‌లకు అంత‌ర్జాతీయ స్థాయిలో గుర్తింపు వ‌చ్చింది. నాటు నాటు సాంగ్ థియేట‌ర్ల‌లో ప్రేక్ష‌కులను సీట్ల‌లో కూర్చోనియ‌కుండా చేసింది అన‌డంలో ఆశ్చ‌ర్యమే లేదు. ఇండియాలో టాప్ డాన్స‌ర్‌లుగా పేరున్న ఈ ఇద్ద‌రు స్టార్లు కలిసి పోటా పోటీగా ఈ పాట‌లో న‌ర్తించారు. ప్రేమ్ ర‌క్షిత్ కొరియెగ్ర‌ఫి అయితే వేరే లెవ‌ల్‌లో ఉంటుంది. చంద్ర‌బోస్ సాహిత్యం అందించిన ఈ పాట‌ను రాహుల్ సిప్లీగంజ్‌, కాల భైర‌వ ఆల‌పించారు.