పవన్ కళ్యాణ్ ఫ్యాన్స్‌కు పండగ లాంటి వార్త చెప్పిన థ‌మన్

April 4, 2021 / 06:25 PM IST

పవన్ కళ్యాణ్ ఫ్యాన్స్‌ ప్రస్తుతం గాల్లో తేలిపోతున్నారు. దానికి కారణం ఆయన నటిస్తున్న సినిమాలు.. వాటికి సంబంధించిన అప్‌డేట్లు వరుసగా వస్తుండటం. పవన్ అభిమానులు ఇప్పుడు వకీల్ సాబ్ ఫీవర్‌లో ఉన్నారు. ఈ సినిమా ఏప్రిల్ 9న ప్రేక్షకుల ముందుకు వస్తోంది. ఇదిలా ఉంటే ఈ సినిమాతో పాటు మరో మూడు నాలుగు సినిమాలు కూడా లైన్‌లో పెడుతున్నాడు పవన్ కళ్యాణ్. అన్ని సినిమాలను వీలైనంత తొందరగా పూర్తి చేయాలని ఆయన దృఢ నిశ్చయంతో ఉన్నాడు. ఇలాంటి సమయంలోనే సంగీత దర్శకుడు థ‌మన్.. పవన్ అభిమానులకు పండగ చేసుకునే వార్త చెప్పాడు. ఈయనతో ఎప్పుడెప్పుడు పని చేసే అవకాశం వస్తుందా అని చాలా సంవత్సరాలుగా వేచి చూస్తున్న థ‌మన్‌కు ఒకేసారి రెండు సినిమాల్లో పనిచేసే అవకాశం ఇచ్చాడు పవర్ స్టార్.

ఇప్పటికే వకీల్ సాబ్ సినిమాకు అద్భుతమైన సంగీతం అందించిన థ‌మన్.. తాజాగా అయ్యప్పనుమ్ కోషియుమ్ రీమేక్ కూడా సంగీతం అందిస్తున్నాడు. ఈ సినిమాలో రానా మరో హీరోగా నటిస్తున్నాడు. సాగర్ కేంద్ర దర్శకుడు. త్రివిక్రమ్ ఈ సినిమాకు స్క్రీన్ ప్లే మాటలు అందిస్తుండటం విశేషం. ఇదిలా ఉంటే ఈ సినిమాలో పవన్ కళ్యాణ్ ఒక పాట పాడుతున్నట్లు అధికారికంగా కన్ఫర్మ్ చేశాడు థ‌మన్. వకీల్ సాబ్ ప్రమోషన్స్‌లో భాగంగా థ‌మన్ ఈ విషయాన్ని బయట పెట్టాడు. తనకు త్రివిక్రమ్ వల్లే పవన్ కళ్యాణ్ తో పనిచేసే అవకాశం వచ్చిందని తెలిపాడు ఈ సంగీత దర్శకుడు.

ఇదిలాఉంటే అయ్యప్పనుమ్ కోషియుమ్ రీమేక్‌లో పవన్ కళ్యాణ్ పాడబోయే పాట అదిరిపోతుంది అని చెప్పాడు ఈయన. ఇప్పటికే కెరీర్‌లో దాదాపు ఎనిమిది పాటలు పాడాడు పవన్ కళ్యాణ్. తమ్ముడు, ఖుషి, జానీ, అత్తారింటికి దారేది, అజ్ఞాతవాసి లాంటి సినిమాలలో బిట్ సాంగ్స్ పాడాడు ఈయన. తాజాగా మరోసారి ఆయన గళం విప్పబోతున్నాడు. మరి ఇది ఎలా ఉండబోతుందో చూడాలి. ముఖ్యంగా జానపద గేయాలు పాడటంలో పవన్ కళ్యాణ్ స్పెషలిస్ట్.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి