Messi Love From India | ‘మెస్సి – లవ్ ఫ్రమ్ ఇండియా’.. స్కూల్ పిల్లల చేతుల మీదుగా ఫస్ట్ లుక్ అండ్ గ్లింప్స్ లాంచ్

Messi Love From India | ప్రముఖ నటుడు ఆంటోని వర్గీస్ ప్రధాన పాత్రలో నటిస్తున్న వైవిధ్యమైన చిత్రం 'మెస్సి - లవ్ ఫ్రమ్ ఇండియా'. ధామా టేల్స్ పతాకంపై ఆకర్ష ఆలపాటి సమర్పణలో ఆకర్ష ఆలపాటి నిర్మాతగా ఈ సినిమా తెరకెక్కుతోంది.

Messi Love From India | ప్రముఖ నటుడు ఆంటోని వర్గీస్ ప్రధాన పాత్రలో నటిస్తున్న వైవిధ్యమైన చిత్రం ‘మెస్సి – లవ్ ఫ్రమ్ ఇండియా’. ధామా టేల్స్ పతాకంపై ఆకర్ష ఆలపాటి సమర్పణలో ఆకర్ష ఆలపాటి నిర్మాతగా ఈ సినిమా తెరకెక్కుతోంది. నిఖిల్ ప్రేమ్ రాజ్ దర్శకత్వం వహిస్తున్న ఈ చిత్రానికి సంబంధించిన ఫస్ట్ లుక్ మరియు టైటిల్ గ్లింప్స్‌ను వినాయక చవితి పర్వదినాన్ని పురస్కరించుకుని కొందరు పాఠశాల విద్యార్థుల చేతుల మీదుగా ప్రత్యేకంగా లాంచ్ చేశారు. పిల్లల చేతుల మీదుగా ఈ కార్యక్రమం నిర్వహించడం సినిమాపై మరింత ఆసక్తిని పెంచింది.

ఈ చిత్రంలో జమునా అబ్దు రెహ్మాన్, విజయన్, సైజు కురూప్, లుక్మన్ అవరణ్, అర్చన వాసుదేవ్ తదితరులు కీలక పాత్రల్లో నటిస్తున్నారు. సాంకేతిక నిపుణుల విషయానికొస్తే, ఈ సినిమాకు ఫైజ్ సిద్ధిక్ సినిమాటోగ్రాఫర్‌గా వ్యవహరించగా, ప్రముఖ సంగీత దర్శకుడు జేక్స్ బిజోయ్  అద్భుతమైన బాధ్యతలు అందించారు. నౌఫల్ అబ్దుల్లా ఎడిటింగ్ బాధ్యతలు నిర్వర్తించగా, అశోక్ మల్లికార్జున వీఎఫ్‌ఎక్స్ వర్క్స్ పర్యవేక్షించారు.

ఈ సందర్భంగా చిత్ర నిర్మాత ఆకర్ష ఆలపాటి మాట్లాడుతూ.. తాము చిన్నతనం నుండి సృజనాత్మక ఆలోచనలతో ముందుకు సాగుతున్నామని, చిన్నవారిని ప్రోత్సహించాలనే ఉద్దేశంతోనే ఈ మలయాళ చిత్రాన్ని తెలుగు ప్రేక్షకుల ముందుకు తీసుకువస్తున్నట్లు తెలిపారు. పీవీఆర్ ఉదయ్, వెంకట్ మంచి తదితరులు తమకు చక్కటి సహకారం అందించారని గుర్తుచేసుకున్నారు. బాలల దినోత్సవ కానుకగా నవంబర్ 14న ఈ సినిమాను గ్రాండ్‌గా థియేటర్లలో విడుదల చేయనున్నట్లు ఆమె ప్రకటించారు. తెలుగు ప్రేక్షకులు తమ చిత్రాన్ని ఆదరించి ఆశీర్వదించాలని మనస్పూర్తిగా కోరారు.

ఈ కార్యక్రమంలో పాల్గొన్న ఎగ్జిక్యూటివ్ ప్రొడ్యూసర్ అరవింద్ బత్తిని మాట్లాడుతూ.. తమ చిత్రానికి మీడియా మరియు శ్రేయోభిలాషుల నుండి లభిస్తున్న మద్దతుకు కృతజ్ఞతలు తెలిపారు. ఈ సినిమా అందరికీ కచ్చితంగా నచ్చుతుందని ఆశాభావం వ్యక్తం చేశారు. అతిథిగా విచ్చేసిన అర్జున్ మాట్లాడుతూ.. ధామా టేల్స్ బేనర్ ద్వారా వస్తున్న ఈ ప్రాజెక్ట్ నూతన ప్రతిభను ప్రోత్సహించేలా ఉంటుందని ప్రశంసించారు. ఫుట్‌బాల్ ఆటగాడు ఎంత బాగా ఆడతాడో, ఈ సినిమా కూడా ప్రేక్షకులను అంతగా అలరిస్తుందని అన్నారు. నవంబర్ 14న విడుదల కానున్న ఈ విభిన్న కథాచిత్రం బాక్సాఫీస్ వద్ద ఎలాంటి విజయాన్ని అందుకుంటుందో వేచి చూడాలి.