Kiran Abbavaram | ఆ కుర్రాడిలో విషయం ఉంది.. దూసుకుపోతున్న కిరణ్ అబ్బవరం..

January 21, 2022 / 06:44 PM IST

Kiran Abbavaram | బ్యాక్ గ్రౌండ్ లేకుండా ఇండస్ట్రీకి రావడం.. వరుస అవకాశాలు దక్కించుకోవడం ఎంత కష్టం అనేది ప్రత్యేకంగా చెప్పాల్సిన అవసరం లేదు. టాలెంట్ ఎంత ఉన్నా అదృష్టం కూడా ఉంటేనే ఇండస్ట్రీలో అవకాశాలు వస్తాయి. అలాంటిది గాడ్ ఫాదర్ లేకుండా ఇండస్ట్రీకి వచ్చి వరుస అవకాశాలు దక్కించుకుంటూ అందర్నీ ఆశ్చర్య పరుస్తున్నాడు యంగ్ హీరో కిరణ్ అబ్బవరం.

ఇప్పటికే కిరణ్ అబ్బవరం నటించిన ఎస్ ఆర్ కళ్యాణమండపం గత ఏడాది మంచి విజయాన్ని అందుకుంది. కరోనా సమయంలో వచ్చి అద్భుతమైన కలెక్షన్స్ సాధించింది ఈ సినిమా. దానికి ముందు రాజావారు రాణిగారు అనే సినిమా చేశాడు. కానీ ఎస్ ఆర్ కళ్యాణమండపం తర్వాత కిరణ్ టాలీవుడ్‌లో మంచి గుర్తింపు సంపాదించుకున్నాడు. ఈ సినిమాకు కథ, మాటలు, స్క్రీన్ ప్లే ఆయనే రాసుకున్నాడు. రూ.2 కోట్లతో తెరకెక్కిన ఈ సినిమా 6 కోట్లకు పైగా వసూలు చేసింది. ప్రస్తుతం ఈ హీరో చేతిలో 4 సినిమాలున్నాయి. సినిమాలపై ఉన్న ఇష్టంతో చేస్తున్న సాఫ్ట్‌వేర్ జాబ్ వదిలేసి ఇండస్ట్రీకి వచ్చాడు. వచ్చీ రాగానే వరుస అవకాశాలు దక్కించుకుంటున్నాడు.

ప్రస్తుతం ‘సెబాస్టియన్’, ‘సమ్మతమే’, ‘ వినరో భాగ్యము విష్ణు కథ’ సినిమాలు చేస్తున్నాడు కిర‌ణ్ అబ్బ‌వ‌రం. ఇందులో వినరో భాగ్యము విష్ణుకథ గీతా ఆర్ట్స్ 2లో వస్తుంది. ఎక్కువగా కొత్త దర్శకులతో సినిమాలు చేస్తున్నాడు కిరణ్. దానికి తోడు సొంతంగా కథలు కూడా రాసుకుంటున్నాడు. ఈ మూడు సినిమాలతో పాటు మరికొన్ని సబ్జెక్టులు కూడా విన్నాడు కిరణ్ అబ్బవరం.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి