Karate Kalyani | టీటీడీ లక్కీ డ్రా పేరుతో మోసం.. రెడ్‌హ్యాండెడ్‌గా పట్టుకున్న న‌టి,దాడికి యత్నించిన నిందితులు

Karate Kalyani | టీటీడీ లక్కీ డ్రా పేరుతో ప్రజలను మోసం చేస్తూ ప్రచారం చేస్తున్న ఇద్దరు నిందితులను సామాజిక కార్యకర్త, కరాటే కళ్యాణి రెడ్‌హ్యాండెడ్‌గా పట్టుకున్నారు. ఆదిభట్ల వండర్‌లా సమీపంలో నిందితులు బహిరంగంగా ప్రచారం చేస్తుండటాన్ని గమనించిన కళ్యాణి, వెంటనే అప్రమత్తమై పంజాగుట్ట పోలీసులకు సమాచారం అందించారు. పోలీసుల సహాయంతో అక్కడికక్కడే నిందితులను అదుపులోకి తీసుకున్నారు.

Karate Kalyani | టీటీడీ లక్కీ డ్రా పేరుతో ప్రజలను మోసం చేస్తూ ప్రచారం చేస్తున్న ఇద్దరు నిందితులను సామాజిక కార్యకర్త, కరాటే కళ్యాణి రెడ్‌హ్యాండెడ్‌గా పట్టుకున్నారు. ఆదిభట్ల వండర్‌లా సమీపంలో నిందితులు బహిరంగంగా ప్రచారం చేస్తుండటాన్ని గమనించిన కళ్యాణి, వెంటనే అప్రమత్తమై పంజాగుట్ట పోలీసులకు సమాచారం అందించారు. పోలీసుల సహాయంతో అక్కడికక్కడే నిందితులను అదుపులోకి తీసుకున్నారు. సమాచారం ప్రకారం.. ఆదిభట్ల వండర్‌లా పరిసరాల్లో ఇద్దరు వ్యక్తులు “టీటీడీ లక్కీ డ్రా” అంటూ కూపన్లు, బహుమతుల పేరుతో ప్రజలను ఆకర్షించే ప్రయత్నం చేస్తున్నారు. తిరుమల తిరుపతి దేవస్థానాలకు (టీటీడీ) సంబంధం ఉన్నట్లు తప్పుడు ప్రచారం చేస్తూ డబ్బులు వసూలు చేస్తున్నారన్న అనుమానంతో కళ్యాణి వారిని ప్రశ్నించారు. సరైన సమాధానం చెప్పకపోవడంతో మోసం జరుగుతోందని గుర్తించి వెంటనే పోలీసులకు సమాచారం ఇచ్చారు.

పంజాగుట్ట పోలీసులు అక్కడికి చేరుకుని నిందితులను అదుపులోకి తీసుకునే క్రమంలో పరిస్థితి ఉద్రిక్తంగా మారింది. ఈ సమయంలో నిందితులు ఆగ్రహంతో కళ్యాణిపైకి దూసుకువచ్చినట్లు సమాచారం. ఆమెను భయపెట్టే ప్రయత్నం చేస్తూ చున్నీ లాగినట్లు ప్రత్యక్ష సాక్షులు చెబుతున్నారు. అయినప్పటికీ ధైర్యంగా నిలబడి కళ్యాణి వారిని ఎదుర్కొనడంతో పెద్ద ప్రమాదం తప్పింది. పోలీసులు వెంటనే జోక్యం చేసుకుని నిందితులను అదుపులోకి తీసుకున్నారు. వారి వద్ద నుంచి లక్కీ డ్రా కూపన్లు, ప్రచార సామగ్రిని స్వాధీనం చేసుకున్నారు. టీటీడీ పేరుతో మోసానికి పాల్పడిన అంశంపై కేసు నమోదు చేసి దర్యాప్తు చేపట్టినట్లు పోలీసులు తెలిపారు. ఇలాంటి తప్పుడు ప్రచారాలకు ఎవరూ నమ్మకూడదని, అనుమానాస్పద కార్యకలాపాలు కనిపిస్తే వెంటనే పోలీసులకు సమాచారం ఇవ్వాలని సూచించారు.

టీటీడీ పేరుతో జరుగుతున్న మోసాన్ని అడ్డుకుని నిందితులను పట్టించడంలో ధైర్యంగా వ్యవహరించిన కరాటే కళ్యాణిని స్థానికులు, నెటిజన్లు అభినందిస్తున్నారు. మహిళలపై దాడికి యత్నించిన నిందితులపై కఠిన చర్యలు తీసుకోవాలని పలువురు డిమాండ్ చేస్తున్నారు. ఈ ఘటన మరోసారి ప్రజల్లో అవగాహన, మోసగాళ్ల విష‌యంలో అప్రమత్తత ఎంత కీలకమో స్పష్టంగా చూపించింది.