Visit:
Kaagitham Padavalu | ప్రతి ఒక్కరి జీవితంలోనూ మరువలేని మధురమైన జ్ఞాపకాలు, ఎప్పటికీ గుండెల్లో నిలిచిపోయే తొలి ప్రేమ అనుభూతులు ఉంటాయి. అలాంటి స్వచ్ఛమైన భావోద్వేగాల సమ్మిళితంగా తెరకెక్కిన సరికొత్త ప్రేమకథా చిత్రం ‘కాగితం పడవలు’. వర్ధన్ మరియు కృష్ణప్రియ జంటగా నటిస్తున్న ఈ బ్యూటిఫుల్ లవ్స్టోరీకి ఎంజీఆర్ తుకారాం దర్శకత్వం వహిస్తున్నారు. ఎస్ఎల్ఎన్ సినీ క్రియేషన్స్, ప్రణధి క్రియేషన్స్, నవ నారాయణ సినీ క్రియేషన్స్ పతాకాలపై కీర్తన నరేష్, టి.ఆర్. ప్రసాద్ రెడ్డి, వెంకట్రాజుల, గాయిత్రమ్మ అంజనప్ప సంయుక్తంగా ఈ చిత్రాన్ని అత్యంత ప్రతిష్టాత్మకంగా నిర్మిస్తున్నారు. ఇప్పటికే ఈ సినిమాకు సంబంధించి విడుదలైన గ్లింప్స్ అలాగే ట్రైలర్ ప్రేక్షకులను విశేషంగా ఆకట్టుకోగా, తాజాగా చిత్ర యూనిట్ నిర్వహించిన సాంగ్ లాంచ్ ఈవెంట్ సినిమాపై అంచనాలను రెట్టింపు చేసింది.
ఈ ప్రత్యేకమైన సాంగ్ లాంచ్ కార్యక్రమంలో చిత్ర బృందం సినిమా విశేషాలను పంచుకుంటూ ప్రేక్షకుల ముందుకు రానున్న తమ అనుభవాలను మనసారా వెల్లడించారు. ఈ సందర్భంగా హీరో వర్ధన్ మాట్లాడుతూ, ‘కాగితం పడవలు’ ప్రయాణం ఒక చిన్న కాలువలో మొదలైందని, అయితే ఊహించని విధంగా తాము ఒక విశాలమైన సముద్రంలోకి ప్రవేశించిన అనుభూతి కలిగిందని భావోద్వేగంతో చెప్పారు. ఈ ప్రయాణంలో ఎన్నో అడ్డంకులు ఎదురైనా, నిర్మాతల సహకారంతో సినిమాను పూర్తి చేయగలిగామని, ఈ రోజుల్లో సినిమా తీయడం ఎంత కష్టమో దాన్ని ప్రేక్షకులకు చేరవేయడం అంతకంటే పెద్ద సవాల్ అని పేర్కొన్నారు. దర్శకుడు తుకారాం ఈ చిత్రాన్ని చాలా అద్భుతంగా తెరకెక్కించారని ప్రశంసిస్తూ, సెప్టెంబర్ 18న అందరూ థియేటర్లలో చూసి సపోర్ట్ చేయాలని కోరారు.
అలాగే దర్శకుడు ఎంజీఆర్ తుకారాం మాట్లాడుతూ, తమ చిత్రానికి నిజమైన హీరోలు తమ నిర్మాతలేనని, వారి సహకారం లేకపోతే ఈ ప్రాజెక్ట్ ఇంత దూరం వచ్చేది కాదని కృతజ్ఞతలు తెలిపారు. ప్రతి మనిషి జీవితంలోనూ ఒక అందమైన ప్రేమకథ ఉంటుందని, థియేటర్లలో ఈ సినిమా చూస్తున్నప్పుడు ప్రతి ఒక్కరూ తమ గతాన్ని, మధుర జ్ఞాపకాలను గుర్తు చేసుకుంటారని భరోసా ఇచ్చారు. ఈ సినిమాను ప్రేక్షకులంతా థియేటర్లలో చూసి అద్భుతమైన అనుభూతిని పొందాలని ఆకాంక్షించారు.
ఈ చిత్రంతో ప్రేక్షకులను అలరించడానికి సిద్ధమవుతున్న హీరోయిన్ కృష్ణప్రియ మాట్లాడుతూ, తెలుగులో తనకు ఇది రెండవ సినిమా అని, దర్శకుడు తుకారాం గారు చూపిన ప్యాషన్ తనను ఎంతగానో ఆకట్టుకుందని తెలిపారు. ఇందులో తనకు చాలా ప్రాధాన్యత ఉన్న మంచి పాత్ర దక్కిందని, ఈ నెల సెప్టెంబర్ 18న సినిమా విడుదలవుతున్న నేపథ్యంలో అందరూ థియేటర్లకు వచ్చి సినిమాను విజయవంతం చేయాలని కోరారు.
నిర్మాత అంజనప్ప మాట్లాడుతూ, ఈ సినిమా నిర్మాణం కోసం యావత్ టీమ్ ఎంతో శ్రమించిందని, దర్శకుడి విజన్తో పాటు డీవోపీ మరియు మేనేజర్ పడిన కష్టాన్ని ఎప్పటికీ మరువలేమన్నారు. ఇక డీవోపీ రుద్రసాయి మాట్లాడుతూ, ‘కాగితం పడవలు’ కేవలం ఒక సినిమా కాదని, దాని వెనుక పెద్ద ఎమోషన్ ఉందని, ప్రస్తుత రోజుల్లో మంచి కంటెంట్ ఉన్న చిత్రాలను ప్రేక్షకులు ఆదరిస్తున్నారని, ఈ చిత్రం కూడా అందరికీ కచ్చితంగా నచ్చుతుందని విశ్వాసం వ్యక్తం చేశారు.
ప్రముఖ నిర్మాణ సంస్థ ఏషియన్ సురేష్ ఎంటర్టైన్మెంట్ ద్వారా సెప్టెంబర్ 18న ఈ చిత్రం ప్రపంచవ్యాప్తంగా గ్రాండ్గా విడుదల కానుంది. AIS.నౌఫల్ రాజా సంగీతం అందించిన ఈ చిత్రానికి రుద్రసాయి సినిమాటోగ్రఫీ, జెస్విన్ ప్రభు ఎడిటింగ్ బాధ్యతలు నిర్వర్తించారు. రెహమాన్ అందించిన సాహిత్యంతో పాటు కిరణ్ కాస్ట్యూమ్స్ సినిమాకు ప్రత్యేక ఆకర్షణగా నిలవనున్నాయి.
