Visit:
Janhvi Kapoor | మెగా పవర్ స్టార్ రామ్చరణ్ హీరోగా, దర్శకుడు బుచ్చిబాబు సానా తెరకెక్కిస్తున్న ప్రతిష్టాత్మక చిత్రం ‘పెద్ది’ విడుదలకు సమయం దగ్గరపడుతున్న కొద్దీ సినిమాపై అంచనాలు మరింత పెరుగుతున్నాయి. ఉత్తరాంధ్ర గ్రామీణ నేపథ్యంతో రూపొందుతున్న ఈ భారీ స్పోర్ట్స్ డ్రామా జూన్ 4న ప్రపంచవ్యాప్తంగా ప్రేక్షకుల ముందుకు రానుంది. ఇప్పటికే విడుదలైన టీజర్, పాటలు, ప్రమోషనల్ కంటెంట్ సినిమాపై భారీ హైప్ తీసుకురాగా, తాజాగా హీరోయిన్ జాన్వీ కపూర్ చేసిన వ్యాఖ్యలు మరింత ఆసక్తిని రేకెత్తిస్తున్నాయి. సినిమా ప్రమోషన్లలో భాగంగా జాతీయ మీడియాకు ఇచ్చిన ఇంటర్వ్యూలో జాన్వీ కపూర్ తన పాత్ర గురించి పలు ఆసక్తికర విషయాలను వెల్లడించింది. ఈ చిత్రంలో ఆమె ‘అచ్చియమ్మ’ అనే పల్లెటూరి యువతి పాత్రలో కనిపించనుంది. అయితే సాధారణ గ్రామీణ యువతి పాత్రల మాదిరిగా కాకుండా, పూర్తిగా భిన్నమైన వ్యక్తిత్వంతో ఈ పాత్ర రూపొందిందని జాన్వీ తెలిపింది.
సినిమాల్లో సాధారణంగా పల్లెటూరి అమ్మాయిలను అమాయకంగా, సిగ్గుపడే స్వభావంతో చూపిస్తారని, కానీ ‘అచ్చియమ్మ’ పాత్ర అలాంటిది కాదని ఆమె చెప్పింది. తనకు తాను నిర్ణయాలు తీసుకుంటూ, చుట్టూ ఉన్న వారిని ప్రభావితం చేసేలా ఉంటుందని పేర్కొంది. కాస్త గర్వం, ఆధిపత్యం కలిగిన యువతిగా ఈ పాత్ర కనిపిస్తుందని వివరించింది. కథలో ఈ పాత్రకు మంచి ప్రాధాన్యం ఉండటంతో పాటు, ప్రేక్షకులను ఆకట్టుకునే ఎన్నో ప్రత్యేకతలు ఉన్నాయని వెల్లడించింది. అంతేకాదు, ఈ సినిమాలో తన ఎంట్రీ సీన్ గురించి కూడా జాన్వీ ఆసక్తికర వ్యాఖ్యలు చేసింది. దర్శకుడు బుచ్చిబాబు తన పాత్రను చాలా ప్రత్యేకంగా డిజైన్ చేశారని తెలిపింది. సాధారణంగా స్టార్ హీరోలకు ఇచ్చే మాస్ ఎలివేషన్లు, భారీ ఇంట్రడక్షన్ సన్నివేశాలు ఎలా ఉంటాయో, అదే తరహాలో ‘అచ్చియమ్మ’ ఎంట్రీని కూడా రూపొందించారని చెప్పింది. ఈ సీన్ థియేటర్లలో ప్రేక్షకుల నుంచి విజిల్స్, చప్పట్లు అందుకునే అవకాశం ఉందని ఆమె నమ్మకం వ్యక్తం చేసింది.
హీరోయిన్ పాత్రకు ఇలాంటి భారీ ఎలివేషన్ ఇవ్వడం చాలా అరుదైన విషయమని, అందుకే ఈ పాత్ర తనకు ఎంతో ప్రత్యేకమైందని జాన్వీ పేర్కొంది. షూటింగ్ సమయంలో కూడా ఈ పాత్రను ఎంతో ఆస్వాదిస్తూ నటించానని చెప్పింది. ముఖ్యంగా గ్రామీణ నేపథ్యం, భాష, హావభావాల విషయంలో ప్రత్యేక శ్రద్ధ తీసుకున్నట్లు వెల్లడించింది. ఇక ‘పెద్ది’ చిత్రంలో రామ్చరణ్ పూర్తిగా కొత్త లుక్లో కనిపించనున్నారు. గ్రామీణ క్రీడల నేపథ్యంలో సాగే ఈ కథలో ఆయన మాస్ మరియు రస్టిక్ అవతార్ అభిమానులను ఆకట్టుకుంటుందని చిత్రబృందం చెబుతోంది. ఇప్పటికే విడుదలైన పోస్టర్లలో రామ్చరణ్ లుక్కు మంచి స్పందన లభించింది.ఈ భారీ చిత్రంలో కన్నడ స్టార్ శివరాజ్ కుమార్, సీనియర్ నటుడు జగపతి బాబు కీలక పాత్రలు పోషిస్తున్నారు. వృద్ధి సినిమాస్ బ్యానర్పై వెంకట సతీష్ కిలారు నిర్మిస్తున్న ఈ చిత్రాన్ని మైత్రీ మూవీ మేకర్స్, సుకుమార్ రైటింగ్స్ సమర్పిస్తున్నాయి. ఆస్కార్ విజేత ఏఆర్ రెహమాన్ సంగీతం అందించడం సినిమాకు మరో ప్రధాన ఆకర్షణగా మారింది.
