Auto Ramprasad | జబర్దస్త్ కమెడియన్ ఆటో రాంప్రసాద్ ఆరోగ్యంపై ఇటీవల రకరకాల కథనాలు వస్తున్నాయి. గాలోడు సినిమా సక్సెస్ తర్వాత సుడిగాలి సుధీర్, ఆటో రాంప్రసాద్, గెటప్ శ్రీను ముగ్గురూ కలిసి ఎంజాయ్ చేశారు. ఆ సమయంలో రాంప్రసాద్ తలకు క్యాప్ పెట్టుకుని కనిపించాడు. అప్పట్నుంచి రాంప్రసాద్కు ఏమైందనే అనుమానం అభిమానుల్లో మొదలైంది. పైగా జబర్దస్ స్టేజి మీద, బయట ఎక్కడకు వెళ్లినా తలకు క్యాప్ పెట్టుకుని కనిపించడంతో ఇవి మరింత ఎక్కువయ్యాయి. బ్రెయిన్ ట్యూమర్ కారణంగా రాంప్రసాద్ తలకు సర్జరీ జరిగిందని ప్రచారం జరిగింది.. ఆ తర్వాత రాంప్రసాద్కు క్యాన్సర్ అని వార్తలు వినిపిస్తున్నాయి. ఈ పుకార్లు మరింత ఎక్కువ కావడంతో రాంప్రసాద్ స్పందించాడు. తన అనారోగ్యంపై వస్తున్న వదంతుల వెనుక ఉన్న అసలు నిజాన్ని బయటపెట్టాడు.
తనకు క్యాన్సర్ ఉందని కొద్దిరోజులుగా జరుగుతున్న ప్రచారాన్ని ఆటో రాంప్రసాద్ ఖండించాడు. ఆ వార్తల్లో ఎలాంటి నిజం లేదని స్పష్టం చేశాడు. తలకు క్యాప్ పెట్టుకుని కనిపించేసరికి అందరూ నాకేమైపోయిందో అని కంగారు పడుతున్నారు. క్యాన్సర్ అని వదంతులు వ్యాప్తి చేస్తున్నారని అన్నాడు. కొద్దిరోజుల క్రితం హెయిర్ ప్లాంటేషన్ చేయించుకున్నానని చెప్పాడు. అందుకే క్యాప్ పెట్టుకుని తిరుగుతున్నా తప్ప.. అంతకుమించి ఏ ఆరోగ్య సమస్యా లేదని క్లారిటీ ఇచ్చారు. నాకేదైనా అయితే మీరు ఉన్నారుగా చూసుకోవడానికి అంటూ చెప్పుకొచ్చాడు. దయచేసి అసత్య వార్తలు రాయకండి అంటూ ఈ సందర్భంగా విజ్ఞప్తి చేశాడు.