Visit:
Hrithik Roshan | బాలీవుడ్ సూపర్స్టార్ హృతిక్ రోషన్ ప్రియురాలు, నటి-సింగర్ సబా ఆజాద్ తీవ్ర అనారోగ్యంతో ఆసుపత్రిలో చికిత్స పొందుతున్న విషయం అభిమానులను ఆందోళనకు గురిచేస్తోంది. దాదాపు రెండు వారాలుగా ఆసుపత్రి బెడ్పైనే చికిత్స తీసుకుంటున్న సబా, తన ఆరోగ్య పరిస్థితిపై సోషల్ మీడియాలో స్పందించారు. హాస్పిటల్లో ఉన్న ఫోటోను షేర్ చేస్తూ తనకు ఏమైంది అనే విషయాన్ని వెల్లడించారు. ‘సైక్లోస్పోరా కయెటానెన్సిస్’ అనే ప్రమాదకరమైన బ్యాక్టీరియా ఇన్ఫెక్షన్ కారణంగా తాను అనారోగ్యానికి గురైనట్లు తెలిపారు. ఈ ఇన్ఫెక్షన్ శరీరంలోకి ప్రవేశిస్తే జీర్ణవ్యవస్థను తీవ్రంగా ప్రభావితం చేస్తుందని, గత 14 రోజులు తన జీవితంలో చాలా కష్టంగా గడిచాయని సబా పేర్కొన్నారు. ఎప్పుడూ ఇంటి ఆహారమే తీసుకుంటూ, బయటకు వెళ్లినప్పుడు కూడా జాగ్రత్తలు తీసుకునే తనకు ఈ ఇన్ఫెక్షన్ ఎలా వచ్చిందో అర్థం కావడం లేదని ఆమె ఆవేదన వ్యక్తం చేశారు.
అనారోగ్యం కారణంగా కేవలం రెండు వారాల్లోనే నాలుగు కిలోల బరువు తగ్గిపోయానని, రోజూ వర్కౌట్స్ చేసే తనకు ఇప్పుడు నడవడమే కష్టంగా మారిందని తెలిపారు. ఈ సందర్భంగా ప్రజలకు ముఖ్యమైన సూచనలు కూడా చేశారు. కూరగాయలు, ఆకుకూరలను వండే ముందు బాగా శుభ్రం చేయాలని, ముఖ్యంగా పచ్చిగా తినే ఆహారం విషయంలో మరింత జాగ్రత్తగా ఉండాలని సూచించారు. బేకింగ్ సోడాతో కూడా శుభ్రపరచడం మంచిదని పేర్కొన్నారు. ఈ కష్ట సమయంలో హృతిక్ రోషన్ తనకు అండగా నిలిచారని సబా భావోద్వేగంగా చెప్పారు. తనను నవ్విస్తూ, మానసికంగా బలంగా ఉండేలా ప్రోత్సహిస్తున్నారని తెలిపారు.
ఇక హృతిక్ రోషన్ సినీ ప్రయాణం విషయానికి వస్తే, 2000లో విడుదలైన కహో నా ప్యార్ హై సినిమాతో హీరోగా ఎంట్రీ ఇచ్చి బాలీవుడ్లో స్టార్ హీరోగా ఎదిగారు. అనంతరం ‘కోయ్ మిల్ గయా’, ‘క్రిష్’ సిరీస్, ‘ధూమ్ 2’, ‘జోదా అక్బర్’, ‘వార్’, ‘ఫైటర్’ వంటి చిత్రాలతో తనదైన ముద్ర వేశారు. వ్యక్తిగతంగా ఆయన మొదట సుస్సానే ఖాన్ ను వివాహం చేసుకుని తర్వాత విడాకులు తీసుకున్నారు. అనంతరం సబా ఆజాద్తో రిలేషన్లో ఉన్నారు. సబా ఆరోగ్య పరిస్థితి వెలుగులోకి రావడంతో అభిమానులు, సినీ ప్రముఖులు ఆమె త్వరగా కోలుకోవాలని సోషల్ మీడియాలో సందేశాలు పంపుతున్నారు. ప్రస్తుతం ఈ విషయం బాలీవుడ్లో హాట్ టాపిక్గా మారింది.
