Nandamuri Balakrishna: టాలీవుడ్ స‌మ‌స్య‌ను ప‌ట్టించుకునే నాథుడే లేరు.. సినిమా టికెట్ల వివాదంపై బాల‌య్య కామెంట్స్‌

Nandamuri Balakrishna: ఆంధ్రప్రదేశ్ రాష్ట్రంలో సినిమా టికెట్ల వివాదంపై సినీ హీరో, హిందూపురం ఎమ్మెల్యే నంద‌మూరి బాల‌కృష్ణ సంచ‌ల‌న వ్యాఖ్య‌లు చేశారు. సినిమా టికెట్ల విష‌యంలో ఏపీ ప్రభుత్వం వ్య‌వ‌హ‌రిస్తున్న‌ తీరుపై

హైద‌రాబాద్‌: ఆంధ్రప్రదేశ్ రాష్ట్రంలో సినిమా టికెట్ల వివాదంపై సినీ హీరో, హిందూపురం ఎమ్మెల్యే నంద‌మూరి బాల‌కృష్ణ సంచ‌ల‌న వ్యాఖ్య‌లు చేశారు. సినిమా టికెట్ల విష‌యంలో ఏపీ ప్రభుత్వం వ్య‌వ‌హ‌రిస్తున్న‌ తీరుపై విమ‌ర్శ‌లు గుప్పించారు. నేడు టాలీవుడ్ సమస్యలను పట్టించుకునే నాథుడే లేకుండాపోయార‌ని ఆయన ఆవేదన వ్యక్తం చేశారు. అందుకే ఏపీలో సినిమా టికెట్ల వ్యవహారంపై తెలుగు సినిమా ఇండస్ట్రీ అంతా కలిసికట్టుగా పోరాడాలని పిలుపునిచ్చారు.

తెలుగు రాష్ట్రాల్లోని రెండు ప్రభుత్వాలు సినిమా రంగానికి సహకరించాలని బాల‌కృష్ణ‌ కోరారు. సినిమా టికెట్ల ధ‌ర‌ల‌పై ఆంధ్ర‌ప్ర‌దేశ్‌ ప్రభుత్వం ఎలాంటి నిర్ణయం తీసుకున్నా తాను కట్టుబడి ఉంటానన్నారు. అయితే ఏపీ ప్రభుత్వం చెబుతున్నట్టు చిన్న సినిమా, పెద్ద సినిమా అనే తేడాలేమీ ఉండవన్నారు. పెద్ద హీరో సినిమా ఫ్లాప‌యితే చిన్న సినిమా అంటారని, చిన్న హీరో సినిమా హిట్ట‌యితే పెద్ద సినిమా అంటారని బాల‌య్య చెప్పారు.

ఇక ఏపీలో సినిమా టికెట్ల వ్యవహారం త్వరలోనే కొలిక్కి వస్తుందని బాల‌య్య‌ ఆశాభావం వ్యక్తంచేశారు. ఎవరో ఒకరు ముందుకొచ్చి పరిశ్రమ సమస్యలను ప్రభుత్వానికి చెప్పాల్సిన అవసరం ఉందని ఆయ‌న అభిప్రాయపడ్డారు. తెలుగు సినిమా మూడు పువ్వులు, ఆరు కాయలుగా వర్ధిల్లాలని ఆకాంక్షించారు. సినిమా ఇండస్ట్రీపై లక్షల మంది ఆధారపడ్డార‌ని, వారంద‌రికీ ఉపాధి ల‌భించేలా ఏపీ, తెలంగాణ ప్రభుత్వాలు సహకరించాలని కోరారు.