Visit:
‘ప్లేయర్‌గా ఆడుతున్నప్పుడు ఆట మీదే దృష్టి పెట్టాలి. పక్క చూపులు చూడకూడదు. నటుడిగా ఉన్నప్పుడు పాత్రపైనే దృష్టి పెట్టాలి. ఇతర వ్యవహారాల్లో వేలు పెట్టకూడదు.’ అని నట దర్శకుడు ఎస్‌.జె.సూర్య అంటున్నారు. ‘గేమ్‌ఛేంజర్‌’లో నటించేటప్పుడు మీలో ఉన్న దర్శకుడు ఎప్పుడైనా బయటకు వచ్చారా? అనే ప్రశ్నకు పై విధంగా ఆయన సమాధానమిచ్చారు. రామ్‌చరణ్‌ కథానాయకుడిగా, శంకర్‌ దర్శకత్వంలో దిల్‌రాజు నిర్మించిన ‘గేమ్‌ ఛేంజర్‌’ సినిమాలో ఆయన కీలక పాత్రధారి. ఈ సినిమా ఈ నెల 10న ప్రపంచవ్యాప్తంగా పానిండియా స్థాయిలో విడుదల కానుంది. ఈ సందర్భంగా ఆదివారం ఎస్‌.జె.సూర్య విలేకరులతో మాట్లాడారు. ‘శంకర్‌గారికి సలహాలిచ్చే స్థాయి నాకు లేదు. ఆయన విజనరీ.
రాజమౌళి లాంటి వాళ్లే ఆయన్ను ఆదర్శంగా భావిస్తారు. అందుకే ఆయన చెప్పింది చెప్పినట్టు చేసుకుంటూ వెళ్లాను. నా నటన చూసి ఇంప్రస్‌ అయ్యి, ‘ఇండియన్‌ 2’లో నాకు అవకాశం ఇచ్చారు. శంకర్‌సార్‌ డైరెక్షన్‌లో చేయడం ఓ గొప్ప వరం.’ అని ఎస్‌.జె.సూర్య చెప్పారు. రామ్‌చరణ్‌లోని గొప్ప నటుడ్ని ఈ సినిమాలో చూస్తారని, ఐఏఎస్‌ రామ్‌నందన్‌గా, అప్పన్నగా రెండు విభిన్న పాత్రల్లో ఆయన కనిపిస్తారని, ముఖ్యంగా అప్పన్న లైఫ్‌ టైమ్‌ గుర్తిండిపోయే పాత్ర అని సూర్య తెలిపారు. ‘ఓ అవినీతి పరుడైన రాజకీయ నాయకుడికీ, ఓ నిజాయితీ పరుడైన ఐఏఎస్‌కీ జరిగే యుద్ధమే ‘గేమ్‌ ఛేంజర్‌’. ఈ యుద్ధాన్ని శంకర్‌ ఎంత బాగా తీశారో థియేటర్లలో చూస్తారు. చాలా ప్రిపేర్‌ అయ్యి ఈ పాత్ర చేశాను. డబ్బింగ్‌ చెప్పేటప్పుడు కూడా చాలా కష్టం అనిపించింది. తెలుగు, తమిళ, హిందీ అన్ని భాషల్లో నేనే డబ్బింగ్‌ చెప్పా. నేను ఎంజాయ్‌ చేస్తూ చేసిన పాత్ర ఇది.’ అని ఎస్‌.జె.సూర్య చెప్పారు.
