Visit:
నటీనటులు: సౌరబ్ ధింగ్ర, అఖిల్ సార్థక్, అనిక్క విక్రమన్, మైమ్ గోపి, శివకుమార్, భూపాల్ రాజు, గాయత్రి గుప్త, అన్నపూర్ణమ్మ తదితరులు.
కథ-దర్శకత్వం-నిర్మాణం: హేమంత్ ఇప్పలపల్లి
బ్యానర్: హేమంత్ ఆర్ట్స్
సంగీతం: శ్రీ వెంకట్, సూరజ్ ఎస్. కురుప్
సినిమాటోగ్రఫీ: వేణు మురళీధర్, రామ్
విభిన్నమైన కథాంశాలు, వినూత్నమైన కాన్సెప్ట్లతో వచ్చే చిత్రాలకు తెలుగు ప్రేక్షకులు ఎప్పుడూ బ్రహ్మరథం పడతారు. ఆ నమ్మకంతోనే, హేమంత్ ఆర్ట్స్ పతాకంపై హేమంత్ ఇప్పలపల్లి కథ, దర్శకత్వ బాధ్యతలతో పాటు నిర్మాణ బాధ్యతలను కూడా భుజాన వేసుకుని తెరకెక్కించిన చిత్రం “ఫస్ట్ టైం”. తక్కువ బడ్జెట్లోనే అద్భుతమైన విజువల్స్, హై టెక్నికల్ వాల్యూస్తో, భారతదేశంలోనే ఒక ప్రతిష్టాత్మక విఎఫ్ఎక్స్ (VFX) వండర్గా ఈ చిత్రాన్ని రూపొందించారు. మరి ఈ సినిమా ప్రేక్షకులను ఏ మేరకు మెప్పించిందో రివ్యూలో చూద్దాం.
కథ
ఈ సినిమా కథ చాలా వినూత్నంగా ప్రారంభమవుతుంది. క్రీస్తు శకం 2304 (2304 AD) కాలంలో ఏలియన్స్ (గ్రహాంతరవాసులు) నేపథ్యంలో కథ మొదలవుతుంది. అసలు ఈ కలియుగం ఎలా అంతమైంది? ఆ తర్వాత ఒక కొత్త సృష్టి, సరికొత్త భారత ప్రపంచం ఎలా ఆవిర్భవించింది? అనే ఆసక్తికరమైన పాయింట్ చుట్టూ సినిమా తిరుగుతుంది. ఈ క్రమంలో కలియుగంలో జరిగిన సంఘటనలను ఏలియన్లకు వివరిస్తూ, ఒక పవిత్రమైన స్త్రీ కొత్త సృష్టికి ఎలా నాంది పలికింది అనేది చూపిస్తారు. మరోవైపు, కథానాయిక అనిక్క విక్రమన్ను ఎలాగైనా పెళ్లి చేసుకోవాలని ఆమె బావ భూపాల్ రాజు, అలాగే ఎలాగైనా ఆమెను దక్కించుకోవాలని విలన్ శివకుమార్ రామచంద్రవరపు, అఖిల్ సార్థక్ ప్రయత్నిస్తుంటారు. ఇలాంటి క్లిష్ట పరిస్థితుల నుండి అనిక్క ఎలా తప్పించుకుంది? ఈ ప్రయాణంలో ఆమెకు సౌరబ్ ధింగ్ర ఎలా పరిచయమయ్యాడు? చివరకు కొత్త సృష్టి ఎలా సాధ్యమైంది? అనే విషయాలు తెలియాలంటే సినిమా చూడాల్సిందే.
నటీనటుల ప్రతిభ:
సౌరబ్ ధింగ్రకు ఇది మొదటి సినిమా అయినప్పటికీ, ఎక్కడా తడబడకుండా ఎంతో పరిణతితో కూడిన నటనను కనబరిచారు. హీరోయిన్ అనిక్క విక్రమన్ తన గ్లామర్తోనే కాకుండా, వైవిధ్యమైన నటనతో సినిమాకు ప్రత్యేక ఆకర్షణగా నిలిచారు. సెకండ్ లీడ్లో ‘బిగ్ బాస్’ ఫేమ్ అఖిల్ సార్థక్, విలన్లుగా నటించిన భూపాల్ రాజు, శివకుమార్ తమ పాత్రల్లో ఒదిగిపోయారు. సీనియర్ నటి అన్నపూర్ణమ్మ, మైమ్ గోపి, అజయ్ రత్నం, గాయత్రి గుప్తా తమ అనుభవంతో పాత్రలకు పూర్తి న్యాయం చేశారు.
సాంకేతిక విభాగం
ఈ సినిమాకు ప్రధాన బలం సాంకేతిక విభాగమే. దర్శకుడు హేమంత్ ఇప్పలపల్లి ఎక్కడా ఆర్టిఫిషియల్ ఇంటెలిజెన్స్ (AI) వాడకుండా, కేవలం తన హ్యూమన్ ఇంటెలిజెన్స్ (HI) నమ్ముకుని, గతంలో తనకు ఉన్న విఎఫ్ఎక్స్ (VFX) అనుభవంతో విజువల్స్ను అత్యంత గ్రాండ్గా తెరకెక్కించారు. బడ్జెట్ పరిమితులు ఉన్నప్పటికీ, ఎక్కడా రాజీ పడకుండా ఒక క్వాలిటీ న్యూ ఏజ్ సినిమాను అందించారు. వేణు మురళీధర్, రామ్ల సినిమాటోగ్రఫీ సినిమాను విజువల్ గా నెక్స్ట్ లెవెల్కు తీసుకెళ్లింది. శ్రీ వెంకట్, సూరజ్ ఎస్ కురుప్ అందించిన సంగీతం, ముఖ్యంగా బ్యాక్గ్రౌండ్ స్కోర్ (BGM) సన్నివేశాలను బాగా ఎలివేట్ చేసింది.
ప్లస్ పాయింట్స్:
నటీనటుల నటన
ఊహకందని గ్రాండ్ విజువల్స్
హృదయానికి హత్తుకునే సంగీతం,
సెకండ్ హాఫ్లో వచ్చే ఉత్కంఠభరితమైన సన్నివేశాలు
మైనస్ పాయింట్స్:
ఫస్టాఫ్లో కొన్ని సన్నివేశాలు కాస్త సాగదీసినట్టుగా అనిపిస్తాయి.
ముగింపు
మొత్తంగా చెప్పాలంటే.. ‘ఫస్ట్ టైం’ చిత్రం సరికొత్త కథాంశంతో, అద్భుతమైన టెక్నికల్ వాల్యూస్తో రూపొందిన ఒక మంచి న్యూ ఏజ్ విజువల్ థ్రిల్లర్. రెగ్యులర్ సినిమాలకు భిన్నంగా సరికొత్త అనుభూతిని పొందాలనుకునే ప్రేక్షకులు, ముఖ్యంగా విజువల్ వండర్స్ ఇష్టపడేవారు ఈ సినిమాను ఖచ్చితంగా థియేటర్లలో చూడవచ్చు.
రేటింగ్: 3/5
