Kubera | హైదరాబాద్, ఏప్రిల్ 14 (నమస్తే తెలంగాణ): తమిళ నటుడు ధనుష్ హీరోగా ప్రముఖ దర్శకుడు శేఖర్ కమ్ముల రూపొందిస్తున్న ‘కుబేర’ చిత్రం వివాదంలో చిక్కుకున్నది. ‘కుబేర’ టైటిల్ తమదని, దాన్ని వేరేవారు కాపీ కొట్టి సినిమా తీయడం అన్యాయమని నిర్మాత కర్మికొండ నరేంద్ర ఆరోపించారు. ఆదివారం ఆయన మీడియాతో మాట్లాడుతూ.. ‘కుబేర’ టైటిల్ను తెలంగాణ ఫిలిం చాంబర్లో రిజిస్టర్ చేసుకున్నామని, ఇప్పటికే షూటింగ్ పూర్తయిన ఈ సినిమా డబ్బింగ్ దశలో ఉన్నదని చెప్పారు.
తాము రిజిస్టర్ చేసుకున్న టైటిల్ను శ్రీ వెంకటేశ్వర సినిమాస్ ఎల్ఎల్పీ బ్యానర్ వారు కాపీ కొట్టి ఇటీవల సినిమా ఫస్ట్లుక్ను విడుదల చేశారని అన్నారు. దీనిపై ఫిలిం చాంబర్ ఆఫ్ కామర్స్కు ఫిర్యాదు చేసినా ఎలాంటి స్పందన రాకపోవడంతో కోర్టును ఆశ్రయించామని తెలిపారు. ‘కుబేర’ టైటిల్ విషయంలో ఎంతటి న్యాయపోరాటానికైనా తాము సిద్ధమేనని స్పష్టం చేశారు. ఇప్పటికైనా ఈ టైటిల్ తమకే దక్కేలా ఫిలిం చాంబర్ ఆఫ్ కామర్స్ చర్యలు తీసుకోవాలని నరేంద్ర కోరారు.