Meher Ramesh | చిరంజీవి సినిమాకు మెహర్ రమేశ్‌ పారితోషికం ఎంతో తెలుసా..?

మెహర్ రమేశ్‌ ( meher ramesh ) దర్శకుడిగా సినిమా వ‌చ్చి ఎనిమిదేళ్లు అవుతుంది. ఈయ‌న ద‌ర్శ‌క‌త్వంలో చివ‌ర‌గా షాడో 2013లో వ‌చ్చింది. ఆ సినిమా త‌ర్వాత మెహ‌ర్ ర‌మేశ్ పూర్తిగా ఖాళీ అయిపోయాడు.

August 8, 2021 / 11:05 PM IST

Meher Ramesh | చిరంజీవి సినిమాకు మెహర్ రమేశ్‌ పారితోషికం ఎంతో తెలుసా..?

Vedalam Remake | మెహర్ రమేశ్‌ ( meher ramesh ) దర్శకుడిగా సినిమా వ‌చ్చి ఎనిమిదేళ్లు అవుతుంది. ఈయ‌న ద‌ర్శ‌క‌త్వంలో చివ‌ర‌గా షాడో 2013లో వ‌చ్చింది. ఆ సినిమా త‌ర్వాత మెహ‌ర్ ర‌మేశ్ పూర్తిగా ఖాళీ అయిపోయాడు. అంతకుముందు ఆయనతో సినిమా అనే ఆలోచనలను షాడో చూసిన తర్వాత పూర్తిగా తుడిచేశారు హీరోలు. నిర్మాతలు అయితే మెహర్ వైపు వెళ్లడం కూడా మానేశారు. మధ్య‌లో రవితేజతో సినిమా చేస్తాడని వార్తలొచ్చాయి.. కానీ ఈయన రిస్క్ తీసుకోలేకపోయాడు. పవన్ కళ్యాణ్‌తో సినిమా చేస్తాడన్నారు కానీ కుదర్లేదు. అయితే ఏడేళ్లు గ్యాప్ ఇచ్చినా కూడా ఏకంగా మెగాస్టార్ చిరంజీవితో సినిమా చేసే అవకాశం అందుకున్నాడు రమేశ్‌. తమిళనాట సూపర్ హిట్ అయిన వేదాళం సినిమాను తెలుగులో రీమేక్ చేసే బాధ్యతను మెహర్ రమేశ్‌కు అప్పగించాడు చిరు.

ఈ సినిమా ప్రీ ప్రొడక్షన్ వర్క్ మొదలై చాలా రోజులైపోయింది. కొన్ని రోజులు షూటింగ్ కూడా చేశాడు. అజిత్ కెరీర్‌లో మాస్ హిట్‌గా నిలిచిన వేదాళంపై చిరు మనసు పడ్డాడు. ముందు ఈ చిత్రాన్ని పవన్‌తో రీమేక్ చేయాలనుకుని.. ఏఎం రత్నం ముహూర్తం కూడా పెట్టాడు. నీసన్ దర్శకత్వంలో ఈ రీమేక్ చేయాలనుకున్నారు కానీ కుదర్లేదు. ఇప్పుడు చిరంజీవి చేతికి వచ్చింది వేదాళం రీమేక్. ఇందులో చిరు చెల్లిగా కీర్తి సురేష్ నటిస్తుందని ప్రచారం జరుగుతుంది. ఇదిలా ఉంటే మెహర్ రమేశ్‌కు ఈ సినిమా కోసం ఎంత రెమ్యునరేషన్ ఇస్తున్నారనేది ఆసక్తికరంగా మారింది. ఈ సినిమా కోసం మెహర్ పారితోషికం తీసుకోవడం లేదు. ఇది నిజమే.. కాకపోతే నెలకు 5 లక్షలు జీతం అందుకుంటున్నాడని తెలుస్తుంది. సినిమా మొదలైన దగ్గర్నుంచి పూర్తయ్యే వరకు ప్రీ ప్రొడక్షన్ కూడా లెక్క పెట్టుకుని.. ఎన్ని నెలలు అయితే అన్ని నెలలు 5 లక్షలు జీతానికి పని చేస్తున్నాడు మెహర్.

ఇప్పటికే ఈ చిత్ర వర్క్ మొదలై ఏడాది దాటిపోయింది. అంటే ఈ పాటికి మెహర్ ఖాతాలో 60 లక్షలు వచ్చాయి. సినిమా పూర్తి కావడానికి మరో ఏడాది పట్టనుంది. అంటే మరో 60 లక్షలు వస్తాయి. అంటే సినిమా కోసం కోటి 20 లక్షలు తీసుకుంటున్నాడు.. పైగా విడుదలైన తర్వాత 20 శాతం వాటా కూడా తీసుకుంటున్నాడని తెలుస్తుంది. అంటే రెండు కోట్లకు అటూ ఇటూగా పారితోషికం అందుకుంటున్నాడు మెహర్ రమేశ్‌. ఈ సినిమాను వీలైనంత తక్కువ బడ్జెట్‌తో పూర్తి చేయాలని చూస్తున్నాడు చిరంజీవి. తన రెమ్యునరేషన్ కాకుండా 25 కోట్లలోపే వేదాళం రీమేక్ పూర్తి చేయాలని మెహర్‌కు చిరు చెప్పినట్లు తెలుస్తోంది. అందుకే టెక్నీషియన్స్ కూడా చిన్న వాళ్లే పని చేస్తున్నారు. మణిశర్మ తనయుడు మహతి స్వరసాగర్ ఈ చిత్రానికి సంగీతం అందిస్తున్నాడు. దాంతో పాటు మిగిలిన వాళ్లు కూడా చిన్న టెక్నీషియన్స్ ఉన్నారు.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి