Maa elections | ఒక్క ఓటమితోనే మెగా ఫ్యామిలీ సత్తా తగ్గిపోతుందా..?

October 13, 2021 / 09:52 PM IST

chiranjeevi | mohan babu | maa elections | mega family | మెగా ఫ్యామిలీ | మా ఎన్నికలు | మోహన్ బాబు | చిరంజీవి — chiranjeevi and mohan babu

Mega family | మా ఎన్నికలు ( MAA elections ) పూర్త‌యిపోయి మూడు రోజులు అయిపోతుంది. కానీ ఇప్పటికీ వాటి గురించి ఇండస్ట్రీలో చర్చ జరుగుతోంది. మరీ ముఖ్యంగా మంచు విష్ణు గెలిచిన తర్వాత జరుగుతున్న పరిణామాలు.. ఎదురవుతున్న పరిస్థితులను చూస్తుంటే రాబోయే రోజులు ఎలా ఉండబోతున్నాయో అనేది ఎవరికీ అర్థం కావడం లేదు. దానికి తోడు ప్రకాశ్‌ రాజ్ ప్యానల్ తీసుకున్న రాజీనామాల నిర్ణయం కూడా సంచలనం రేపుతుంది. ప్రాంతీయ భావం, సంకుచితత్వం ఉన్న చోట తాను ఉండలేనంటూ ప్ర‌కాశ్ రాజ్ రాజీనామా చేశారు. ఆయ‌నే కాదు నాగబాబు లాంటి వాళ్లు కూడా మా అసోసియేషన్ కు రాజీనామా చేసి బయటకు వెళ్లిపోయారు. ఇదిలా ఉంటే ఈ ఎన్నికలను మోహన్ బాబు వర్సెస్ చిరంజీవిగా చాలామంది అభివర్ణించారు. ఎందుకంటే చిరంజీవి సపోర్ట్ చేసిన ప్రకాశ్‌ రాజ్ ను మంచు విష్ణు ఇప్పుడు ఓడించాడు. దీంతో టాలీవుడ్‌లో, మా అసోసియేషన్‌లో మెగా ఫ్యామిలీ హవా ఎలా ఉండబోతుందని ఇప్పుడు ఆసక్తికరమైన చర్చ మొదలైంది.

మా ఎన్నికలు ( MAA elections ) ఎలా జరిగాయి అనే విషయంపై ఇప్పుడు మాట్లాడుకుని వేస్ట్ అంటున్నారు విష్ణు వర్గం. మరోవైపు రౌడీయిజం, బెదిరింపులతోనే మా ఎన్నికల్లో వాళ్లు గెలిచారు అంటున్నది ప్రకాశ్‌ రాజ్ ప్యానల్. ఏదేమైనా చిరంజీవిపై మోహన్ బాబు గెలిచాడు.. ఇప్పటి నుంచి ఇండస్ట్రీలో మోహన్ బాబు హవా నడుస్తుంది.. మంచు కుటుంబం చెప్పిందే జరుగుతుంది.. అని టాలీవుడ్‌లో కొంత‌మంది చెప్పుకుంటున్నారు. అంతెందుకు మోహన్ బాబు ఇండస్ట్రీ పెద్ద అంటున్నారు కొందరు సీనియర్ నటుడు నరేశ్‌. మోహన్ బాబును మరో దాసరి నారాయణ రావుతో పోల్చాడు. కేవలం ఒకే ఒక్క ఎన్నికలు ఓడిపోయిన అంతమాత్రాన మెగా ఫ్యామిలీ సత్తా టాలీవుడ్‌లో తగ్గిపోతుందా అనేది చాలామంది అడుగుతున్న ప్రశ్న. ఎందుకంటే మా అసోసియేషన్ మొదలుపెట్టి 25 సంవత్సరాలు గడిచింది. ఇప్పటి వరకు చిరంజీవి సపోర్ట్ చేసిన క్యాండిడేట్ ఓడిపోయింది లేదు. కానీ తొలిసారి ఆయన చెప్పిన వాడు కాకుండా మరొకరు అధ్యక్షుడిగా ఎన్నికయ్యాడు. దాంతో మాలో చిరంజీవి ఫ్యామిలీ ఆధిపత్యానికి తెరపడింది అంటూ కొందరు చెబుతున్నారు. అయితే ఇందులో ఎలాంటి నిజం లేదు.. వచ్చే ఎన్నికల నాటికి చిరంజీవి అంటే ఏంటో అందరికీ తెలుస్తుంది అంటూ మా సభ్యులు కొందరు జరగబోయేది చెప్తున్నారు. ఏదేమైనా కూడా కేవలం ఒకే ఒక్క ఓటమి మెగా ఫ్యామిలీ సత్తా తెలియజేస్తుంది అంటే ఎవరు నమ్మరు.

లోక‌ల్ టు గ్లోబ‌ల్ వార్త‌ల కోసం.. న‌మ‌స్తే తెలంగాణ ఫేస్‌బుక్‌, ట్విట‌ర్ పేజీల‌ను ఫాలో అవ్వండి